اسلام آباد۔ 05 اگست (اے پی پی) صدر مملکت ڈاکٹر عارف علوی پارینے کہ مچ آ دنیا ٹی بھارت نا 5 اگست 2019ء نا اسہ کنڈی و غیر کانودی گام گیج، کشمیری تیا بھارتی ظلم و بربریت، استحصال و انسانی حق آتا بھلا خلاف ورزی تا برخلاف توار بڑز کننگ انگ ءِ، بھارت بھلو وخت اسے آن کودک کشمیری تا برخلاف ظلم و استحصال آن پد ہم وفتا حق خودارادیت نا بدل مفروک عزم ءِ توننگ اٹ بے سہب مسنے، کشمیری تا جہد آجوئی ایسر اسکان سرمریکو ہمو وخت مُر اف ہراتم آجوئی نادے پاش کیک، جہانی برادری و او آئی سی مقبوضہ کشمیر اٹ بھارتی بیدادی ءِ تورفنگ،آجوئی صحافت ءِ پک کننگ و انٹرنیٹ نا بندش ءِ چٹفنگ کن تینا کڑد ءِ ادا کیر، غٹ سیاسی جماعت آک و قوم کشمیر نا ویل آ یکجاءُ۔ داخیال آتا درشانی ءِ چارشنبے نادے آ یوم استحصال نا بابت ریلی نا بشخ ہلوک آتیان تران کرسا کرے۔ صدر مملکت پارے کہ یوم استحصال نا مسخت 5 اگست 2019ء نا بھارت نا غیر کانودی اسہ کنڈی گام گیج آتا برخلاف اقوام عام ءِ کلہو تننگ ناءِ و کشمیری تتون یکجہتی نا درشانی ءِ کننگ نا ءِ، بھارت 5 اگست 2019ء آ 35 اے و 370 ءِ آئین آن چٹفسا کشمیر نا خصوصی حیثیت ءِ چٹفے۔ اوپارے کہ بھارت ہر فورم آ پارے کہ کشمیر ہڑتوم آ کنڈآتا ویل ءِ حالانکہ پاکستان و بھارت نا نیام اٹ ہڑتوم آ کنڈآتا ویل آتا ایسری کن 1973ء نا شملہ معاہدہ کننگا، بھارت دامعاہدہ نا رداٹ کشمیر نا جھیڑہ نا بابت وخت اس ہم مذاکرات کن پاکستان تون تیار متو۔ بھارت بہانہ کرسا مذاکرات آن نرنگ نا کسر ءِ اختیار کیک۔
