اسلام آباد۔ 05 اگست (اے پی پی) بنجائی وزیر حوالکاری وشینکاری سینیٹر شبلی فراز و سیکرٹری حوالکاری و شینکاری اکبر حسین درانی نا کماشی ٹی یوم استحصال کشمیر نا وخت آ خیابان سہروردی روڈ آ وزارت حوالکاری و شینکاری و ذیلی ادارہ غاتا اسیجائی ریلی اس کشنگا، ریلی ٹی بشخ ہلوک آک مودی سرکار نا ظلم و کشمیری تتون پبی یکجہتی نا عزم انا درشانی ءِ کریر۔ چارشنبے نادے آ یوم استحصال کشمیر نا رداٹ خیابان سہروردی روڈ(زیروپوائنٹ فلائی اوور) آن برانزی ریلی نا بناءِ کننگا ہرانا کماشی ءِ بنجائی وزیر حوالکاری و شینکاری سینیٹر شبلی فراز و سیکرٹری حوالکاری وشینکاری اکبر حسین درانی ئسک کریر۔ ریلی پریس انفارمیشن ڈیپارٹمنٹ نا مون آ ایسر مس، ہراڑے ریلی ٹی بشخ ہلوک آتیان تران کرسا بنجائی وزیر حوالکاری وشینکاری سینیٹر شبلی فراز پارے کہ اینو نا دے نن جہانی برادری ءِ دا باور کرفنگ خوانہ کہ کشمیر نا مخلوق آ ہرا ظلم و بربریت نا طوفان اسے ہندوستان ءِ اونا حساب ءِ تروئی مریک۔ اوپارے کہ ہندوستان مست انگا ہُچ آنبار ڈیہہ نا امن و سوگوی ءِ توازن ءِ نزور کننگ ءِ، جہانی برادری ءِ دانا نوٹس ءِ ہلوئی مریک۔ اوپارے کہ اینو نن کشمیر نا مظلوم، کودک مخلوق تون دا عزم انا درشانی ءِ کینہ کہ پاکستان نا 22 کروڑ الس اوفتے تون ہم کوپہ سلوک ءِ۔ اوپارے کہ ننا ننا دا سرینگر ایکسپریس وے انا مزل سرینگر ءِ، نن دا ایکسپریس وے آن سرینگر سرمرسا مظلوم و کودک کشمیری تا کمک ءِ کرسا اوفتے بھارتی تسلط آن آجوکرفنہ، انشاء اللہ زوت کشمیری آجوئی نا ساہ ہلیرہ۔ اوپارے کہ یوم استحصال کشمیر اڈتننگ نا مسخت کشمیری تیابرجا ظلم انا برخلاف توار بڑز کننگ نا ءِ انتئے کہ جہانی برادری کشمیری الس آ مروک آبیدادی تیا چُپ ءِ، دا منافق انگا رویہ غان جہانی امن ءِ نسخان رسینگ کیک۔ اوپارے کہ بھارت مقبوضہ کشمیر ءِ دنیا نا غٹ آن بھلا زندان اٹ بدل کرینے، جبری بے گوا، ورناتیا ظلم، پیلٹ گن آتا کاریم اٹ اتنگ و غیر کانودی فوجی گھیڑ دننیا ءِ انت اکن نظر بفننگ ءِ، اینو پاکستانی 22 کروڑ الس نا اسہ موقف ءِ کہ بھارت ءِ دا غٹ بیدادی تا حساب ءِ تروئی مریک۔ ریلی ٹی ایم ڈی اے پی پی طارق محمود خان، پرنسپل انفارمیشن آفیسر شاہیرہ شاہد، ڈائریکٹر جنرل ریڈیو پاکستان عنبرین جان، ڈی جی آئی پی سہیل علی خان، ڈی جی ڈیمپ سعید جاوید، ڈی جی ای پی عمرانہ وزیر تون اوار وزارت حوالکاری و شینکاری نا ذیلی کمامدار و زند انا چندی بشخ آتیان تعلق تخوک آ بندغ آتا بھلو کچ اس بشخ ہلک۔
