اسلام آباد۔ 05 اگست (اے پی پی) وزیر خارجہ مخدوم شاہ محمود قریشی پارینے کہ کشمیریک تنیا افس، ہر پاکستان اوفتے تون ہم کوپہ سلوک ءِ، وزیراعظم عمران خان بطور سفیر کشمیری تا مقدمہ ءِ کننگ ءِ، ای اینو کشمیری تتون وعدہ کیوہ کہ ہراوخت اسکان اوفتا سرکڑدہ غاک بند ءُ ای اوفتا وکالت ءِ کیوہ۔ یوم استحصال نا بابت خصوصی ویڈیو کلہو اٹ وزیر خارجہ پارے کہ اینو ای اسہ وار ولدا آزاد کشمیر و مقبوضہ کشمیر آن تعلق تخوک آ غٹ کشمیری تے باور کرفنگ خواوہ کہ نم تنیا افیرے، ہر پاکستان نم تون ہم کوپہ سلوک ءِ، ننے نما تکلیف آتا احساس ارے، مقبوضہ کشمیر اٹ برجا انسانی حق آتا برخلاف خلا ف ورزی و کودک کشمیری تیا کروک آ بیدادی آن دنیا بے خبر اف، اینو دنیا نا مون آ ہندوستان نا اصلی دروشم پاش مسنے، وزیراعظم عمران خان بطور سفیر کشمیری تا مقدمہ ءِ کننگ ءِ، ای اینو کشمیری تتون وعدہ کیوہ کہ ہراوخت اسکان اوفتا سرکڑدہ غاک بند ءُ ای اوفتا وکالت ءِ کیوہ۔ وزیر خارجہ پارے کہ ای کشمیری تا توار ءِ ہر ملک انا دارالحکومت اسکان دیوہ۔ بطور وزیر خارجہ نما ترجمانی ءِ کننگ کنا فرض اٹی اوار ءِ و انشاء اللہ فتح نما مریک، 4 تُو انا لاک ڈاؤن آن دنیا پوہاڑ کرے ولے مقبوضہ جموں و کشمیر اٹ برجا کرفیو و فوجی گھیڑ ءِ اینو اسہ سال اس پورو مسنے۔ کودک کشمیریک فوجی گھیڑ اٹ اِرا لاک ڈاؤن ءِ سگنگ آ بیوس ءُ۔ غاصب آتا دا غلط گمانی ءِ کہ او جبر انا کمک اٹ کشمیری تا حوصلہ ءِ شیف شاغرہ۔ تاریخ داہیت انا شاہد ءِ کہ ہراتم اسہ قوم اس سلک تو اسہ غاصب فوج اس ہم اوفتے توننگ کپک و اینو کشمیریک بش مسنو و پاکستانی قوم اوفتے تون سلوک ءِ، انشاء اللہ نن سرسہب مرینہ و کشمیر زوت دا جبر آن آجومریک۔
