کوئٹہ۔ 04 اگست (اے پی پی) قومی اسمبلی نا ڈپٹی اسپیکر قاسم خان سوری پارینے کہ مقبوضہ کشمیر نا ورناک بھارتی ظلم و جور انا برخلاف بے مٹ قربانی تا پوسکن ءُ داستان اس ہلسا بھارت نا مکروہ دروشم ءِ مچ آ دنیا نا مون آ پاش کرینو۔ پاکستان تحریک انصاف 5 اگست آ مچ آ بلوچستان اٹ یوم استحصال کشمیر ءِ پبی وڑاٹ اڈ ایتک۔ داخیال آتا درشانی ءِ او پاکستان تحریک انصاف بلوچستان نا ایڈیشنل سیکرٹری ادریس تاج نا کماشی ٹی اوڑدہی کروک آ پاکستان تحریک انصاف نا ڈل اتون گپ و تران کرسا کرے۔ قومی اسمبلی نا ڈپٹی اسپیکر قاسم خان سوری پارے کہ ہندوستان آئین نا آرٹیکل 370 و مقبوضہ کشمیر نا خصوصی حیثیت ءِ چٹفسا اقوام متحدہ نا قرارداد آتا خلاف ورزی ءِ کرینے، وزیراعظم عمران خان کشمیری تا توار مرسا مچ آ دنیا ٹی ہر فورم آ مقبوضہ کشمیر نا مقدمہ ءِ گچین وڑاٹ پیش کرینے ہراڑآن بھارت نا اصل دروشم دنیا نا مون آ پاش مسنے اوپارے کہ کشمیر اٹ آرٹیکل 370 نا چٹفنگ ءِ اسہ سال اس پورو مننگ آ حکومت نا یوم استحصال کشمیر اڈتننگ نا فیصلہ مقبوضہ کشمیر نا الس نا جوزہ و است خواہی تا ترجمانی ءِ کیک، کشمیر نا ویل انا ایسری اقوام متحدہ نا قرارداد آتیا عملدرآمد اٹ ممکن ءِ۔ قاسم خان سوری پارے کہ آرایس ایس نا بدمعاش آک مسلمان و ایلو اقلیت آتیا ہندوستان اٹ ڈغار ءِ تنک کرینو وخت اس کہ پاکستان اٹ غٹ اقلیت آتے رکھ دوئی ءِ اوپارے کہ ایوان بالا کشمیر نا حریت پسند راہشون سید علی گیلانی ءِ آجوئی کشمیر کن خذٰمت آتا امنا ٹی پاکستان نا غٹ آن بھلا سول اعزاز’’نشان پاکستان‘‘ تننگ نا قرارداد ءِ امنائی وڑاٹ منظور کرینے۔
