اسلام آباد۔ 04 اگست (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ مچ آ پاکستانی و کشمیری قوم (اینو) چارشنبے نادے آ تدوک آ سال 5 اگست نا بھارتی گام گیج نا برخلاف یوم استحصال اڈ ایترہ۔ سے شنبے نادے آ داڑے جاری بیان اٹ علی امین گنڈاپور پارے کہ 5 اگست نا دے کشمیر نا تاریخ اٹ اسہ پین تہار ءُ دے اسے، مقبوضہ کشمیر اٹ بھارتی اسہ کنڈی و غیر کانودی گام گیج نا برخلاف مچ آ قوم سراپابرانز مریک، 5 اگست 2019ء آ بھارت اسہ وار ولدا اقوام متحدہ و جہانی کانودءِ لتاڑانے۔ علی امین گنڈاپور پارے کہ پاکستان و مچ آ دنیا 5 اگست نا بھارتی اسہ کنڈی و غیر کانودی گام گیج آتے رد کرینے، کشمیری تتون یکجہتی نا درشانی ءِ کننگ کن اسہ منٹ اسے نا خاموشی اختیار کننگک۔ اسلام آباد اٹ کشمیری تتون یکجہتی نا درشانی ءِ کننگ کن یکجہتی واک کننگک۔ زالبول پارلیمنٹرین نا ڈل کشمیری تتون یکجہتی نا درشانی ءِ کننگ کن مظفر آباد آ روانہ مسنے۔ علی امین پارے کہ ڈل مظفر آباد اٹ باہوٹ آتا کیمپ اٹ کشمیری خاہوت و چناتتون اوڑدہی کیک، پاکستان نا چناچنا تینا کشمیری ایڑھ و ایلم تتون سلوک ءُ۔
