اسلام آباد۔ 04 اگست (اے پی پی) غیر کانودی بھارتی مقبوضہ کشمیر نا مسلمان تا حق ءِ کُننگ، کشمیری تا نسل کشی و کشمیر اٹ ہندوتا آبادکاری کن بھارت نا کنڈآن آرٹیکل 370 و 35 اے انا چٹفنگ نا مون انگا کانود ءِ نافذ مروک (اینو) اسہ سال اس پورو مسنے۔ جموں ٹی 61 درسد و دامان کشمیر اٹ 93 درسد آبادی مسلمان ءُ۔ بھارتی آئین نا دفعہ 370 نا رداٹ غیر کانودی بھارتی مقبوضہ کشمیر ءِ بنجاٹی اسہ خصوصی حیثیت اس دوئی ئس، مقبوضہ کشمیر ءِ تینا آئین جوڑ کننگ نا موکل ءِ و چندی باندات آتیٹی بھارتی بنجائی آئین نا نفاذ جموں کشمیر اٹ ممنوع ئس، دا آرٹیکل نا رداٹ مقبوضہ کشمیر اٹ کشمیری تیان بیدس بھارت نا اسہ شاری اس ہم یا ادارہ اس جائیداد ہلنگ کپک وخت اس کہ سرکاری نوکری، ریاستی اسمبلی کن وونٹ بٹنگ و ایلو آسودہی تا کانودی حق بیرہ کشمیر اٹ ودی مروک آ کشمیری باتی تے دوئی ئس۔ آرٹیکل 35۔ اے ہندوستان نا آئین نا آرٹیکل 370 نا ذیلی شق ءِ ہرانا رداٹ مقبوضہ کشمیر اٹ ڈغار و ایلو غیر منقولہ جائیدادہلنگ سرکاری نوکری، وظیفہ، ریاستی اسمبلی کن وونٹ بٹنگ و ایلو آسودہی تا کانودی حق بیرہ اونا آخبتی باتی تے دوئی ءِ۔ آرٹیکل 370 نا رداٹ بھارتی حکومت، دفاع، خارجہ امور و مواصلات آن بیدس ایلو اہم باندات آتیا کانود سازی کن کشمیر نا کانود ساز اسمبلی نا منت وار ءِ۔ بھارت اسہ وار ولدا تینا ضد ءِ برجاتخسا 6 اگست 2019ء آ مودی سرکار کشمیری تا حق ءِ کُننگ کن بھارتی آئین آن آرٹیکل 370 و 35۔ اے ءِ چٹفے، ہرانا رداٹ مقبوضہ کشمیر نا خصوصی آئینی حیثیت و دامان نا ریاستی درجہ ءِ چٹفنگا۔ داسہ غیر کانودی بھارتی مقبوضہ کشمیر آ بھارتی آئین نا اطلاق مس۔ دا آرٹیکل نا چٹفنگ کن بنجائی حکومت کشمیر نا کانود ساز اسمبلی تون ہچ ءُ سلابت اس کننگ تو ہرا کہ بھارت نا سپریم کورٹ نا فیصلہ نا ہم خلاف ورزی ئس، جموں و کشمیر و لداخ نا باندات براہ راست بنجائی وزیر داخلہ امیت شاہ غا بسر، دا آرڈر نا رداٹ کشمیر نا کانود ساز کونسل ءِ چٹفنگا، صدارتی پرمان نا رداٹ مقبوضہ کشمیر نا جتا ریاست نا درجہ ءِ چٹفنگا۔ جموں کشمیر نا جتا بیرک چٹا و زالبول آتا بابت روایتی کانود نا اطلاق ولدا غیر موثر مس، بھارت نا ایلو بشخ آتا شاری تے کشمیر اٹ جائیداد ہلنگ نا موکل تننگا۔ دا صدارتی آرڈر نا پد اٹ ہرابدنیتی ڈکوک ءِ او مقبوضہ کشمیر اٹ ہندی آبادی نا حسابی برتری ءِ چٹفنگ نا ءِ، داہوبہو ہموماڈل ءِ ہرادے فلسطین آ کوزہ کننگ کن صہیونیک تینا کریسر، شق چٹنگ آن فلسطینی تیانبار کشمیریک ہم بے وطن مریرہ، انتئے کہ بھلو کچ اسے ٹی غیر مسلم آبادکار کشمیر اٹ آباد مریرہ، ہرااوفتا ڈغار، وسیلہ و روزگار آ کوزہ گرمریرہ۔ داکانود نا چٹفنگ نا مسخت داہم ارے کہ کشمیر نا پیشن آن شدت پسند ہندوتے ہموڑے اتسا جاگہ تننگا ہراڑآن منہ سال اٹ آبادی نا تناسب بھاز بے وڑ بگڑینگ انگ کیک ہنداخاطرآن مسلمان گیشتری اقلیت اٹ بدل مریک۔
