اسلام آباد۔ 04 اگست (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ غیر کانودی بھارتی مقبوضہ جموں و کشمیر اٹ فوجی گھیڑ انا اسہ سال پورو مسنے، دادے ءِ یوم استحصال نا وڑاٹ اڈتننگک، کشمیر نا مخلوق غاصبانہ فوجی واک آن جان ءِ چٹفنگ خوارہ، جہانی برادری بھارت آ زور شاغے کہ او کشمیر آن پیش تمے۔ سے شنبے نادے آ وزارت پارلیمانی امور اٹ میڈیا نا نمائندہ غاتون گپ وتران کرسا اوپارے کہ غیر کانودی باندات اٹی میڈیا نا نمائندہ غاتون گپ وتران کرسا اوپارے کہ غیر کانودی بھارتی مقبوضہ جموں و کشمیر اٹ فوجی گھیڑ انا اسہ سال پورو مسنے دابابت سینیٹ نا اہم ءُ دیوان اس بٹنگ انگانے۔ اوپارے کہ ای دیوان اٹ اسہ تحریک اس پیش کیوہ، دیوان اٹ کشمیر آن بیدس پین ہچ ءُ سیاسی ہیت وگپ اس مفک۔ سینیٹ دیوان نا مسہ ٹکی ایجنڈا ءِ۔ اوپارے کہ کشمیری تے حق خودارادیت تننگے، بھارت کشمیر آن پیش تمے۔ ڈاکٹر بابر اعوان پارے کہ بانی پاکستان قائد اعظم محمد علی جناح کشمیر ءِ پاکستان نا شہ رگ گونداسس، و ننا آخیریکو مزل کشمیر مریک پاکستان ءِ، دارداٹ اسلام آباد نا کشمیر ہائی وے نا پن ءِ بدل کرسا سرینگر ہائی وے تخنگانے۔ اوپارے کہ تدوک آ دے اسلام آباد ہائی کورٹ کلبھوشن کیس اٹ اہم ءُ فیصلہ اس تسنے، داباندات آ گڑاس اناڑی ابہام ودی کریرہ، دا کیس اٹ اقوام متحدہ نا چارٹر، آئین نا آرٹیکل 10اے و جہانی عدالت انصاف نا فیصلہ ءِ مون آ تخنگک۔ اوپارے کہ چیف جسٹس اسلام آباد ہائی کورٹ اطہر من اللہ نا فیصلہ آن ابہام مُر مسنے۔ اوپارے کہ چارشنبے نادے آ پاکستان نا گلی کوچہ غاتون اوار مچ آ دنیا ٹی کشمیری و پاکستانی دنیا نا منصف آتے کلہو ایتنہ۔ اوپارے کہ سینیٹ دیوان اٹ دنیا ءِ دا کلہو تننگک کہ غیر کانودی بھارتی مقبوضہ کشمیر اٹ انسانی حق انا خلاف ورزیک بند مریر، و ریاست پاکستان نا کشمیرنا بارواٹ پالیسی نا بابت ننا سنگت ملک آک نن تون اوار سلر۔ پاکستان نا کشمیری تتون یکجہتی نا درشانی بے مٹ ءِ۔ وزیراعظم نا مظفرآباد نا دورہ نا مسخت ہم دنیا ءِ کلہو تننگ نا ءِ۔ اوپارے کہ پاکستان جہانی عدالت انصاف نا فیصلہ غا عملدرآمد کننگ نا زموارءِ۔ پاکستان اسہ ریاست اسے نا حیثیت اٹ تینا زمواری تے پورو کیک۔ اسہ سوج اسے نا ورندی ٹی اوپارے کہ پارلیمنٹ نا اسیجائی دیوان اٹ 11 بل پیش کننگک، دافتے ٹی اِرا 2 بل بے کچ اہم ءُ ہرافتے ٹی اسلام آباد ہائی کورٹ اٹ جج آتا کچ ءِ ودفنگ و میوچل لیگل اسسٹنٹ آتا بل اوار ءِ۔
