اسلام آباد۔ 04 اگست (اے پی پی) بھارت نا کنڈآن 5 اگست 2019 ء نا غیر کانودی کوزہ ٹی کشمیر نا خصوصی حیثیت نا چٹفنگ نا غیر کانودی و غیر آئینی گام گیج نا برخلاف مچ آ ملک اٹ چارشنبے نادے آ یوم استحصال اڈتننگک۔ داوخت آ کشمیری تتون یکجہتی نا درشانی ءِ کننگ کن وزیراعظم پاکستان عمران خان مظفرآباد اٹ کانود ساز اسمبلی نا دیوان آن تران کیک و مظفرآباد اٹ ریلی نا کماشیءِ کیک۔ صدر مملکت ڈاکٹر عارف علوی اسلام آباد اٹ کشمیری تا مخ تفی ٹی ریلی نا کماشی ءِ کیک۔ شارشار اٹ دا گام گیج نا برخلاف ریلی کشنگک۔ بزرگ حریت راہشون سید علی گیلانی ءِ نشان پاکستان تننگ نا پڑو ءِ کننگک۔ پرنٹ و الیکٹرانک میڈیا غا صدر، وزیراعظم، ہر چار آ صوبہ غاتا وزیراعلیٰ، گلگت بلتستان نا نگران وزیراعلیٰ، صدر و وزیراعظم آزاد کشمیر نا خصوصی کلہو نشر یا شینک کننگک۔ وزیراعظم نا آزاد کشمیر کانود ساز اسمبلی نا دیوان آن تران نا وخت آ اسہ منٹ اکن چُپ سلنگک و ٹریفک ءِ توننگک۔ ہرچارآصوبہ گلگت بلتستان اٹ گورنر و وزیراعلیٰ نا کماشی ٹی کورونا ایس او پی تیا عمل کرسا یکجہتی ریلی کشنگک۔ دادے آ یوم استحصال اڈتننگ نا مسخت دنیا ءِ بھارت نا 5 اگست 2019ء نا غیر کانودی و اسہ کنڈی گام گیج و اونا آڑاٹ اسہ سال آن کشمیر اٹ برجافوجی گٹ و ظلم و جور آن معلومدار کننگ نا ءِ۔ سہب انا 10 بجہ غان سائرن خلنگک۔ اقوام متحدہ نا مبصر مشن ءِ سیکرٹری جنرل نا پن یات داشت ہم پیش کننگک۔ وزارت پوسٹل سروسز نا کنڈآن خصوصی ڈاک ٹکٹ اس جاری کننگک ہراٹی بھارت نا غیر کانودی کوزہ ٹی کشمیری تا بھارتی فوج انا ظلم آن نانا نا شہیدی آن پد اونا میت نا زی آ تولوک اونا مسہ سال انا نواسہ نا عکس جہانی ضمیر ءِ سرفنگ کن چھاپ کننگانے۔ مچ آ دنیا ٹی پاکستانی سفارت خانہ غاتیٹی دادے انا بابت خصوصی دود مریک۔ دادے کشمیر نا تاریخ نا اسہ پین تہار ءُ دے اسے۔ ہراتم کشمیری تے اوفتا بنداوی حق و سلامتی کونسل نا قرارداد آتے مون آ تخسا دوئی خصوصی حیثیت نا چٹفنگ نا غیرکانودی و اسہ کنڈی گام گیج ءِ چست کننگا۔
