لاہور۔ 04 اگست (اے پی پی) پاکستان تحریک انصاف نا سینئر مرکزی و مسکوہی بنجائی وزیر ہمایوں اختر خان پارینے کہ انشاء اللہ ہمودے ضرور بریک ہراتم 5 اگست نا دے بھارت کن خلیفوک ءُ تغ اس مریک، مودی سرکار واک انا زور آ زیات ہرے اسکان کشمیر آ تینا ظلم و جور ءِ برجاتخنگ کپک و اودے دے انا دے اس منفی چم بازی تیان سرنڈر کروئی مریک۔ پاکستانی قوم مقبوضہ جموں و کشمیر نا خصوصی حیثیت ءِ چٹفنگ نا بھارتی گام گیج ءِ مسترد کیک و اینو ’’یوم استحصال‘‘ اڈ ترسا کشمیری تتون پبی یکجہتی نا درشانی ءِ کننگک۔ داخیال آتا درشانی ءِ او تینا دفتر اٹ پارٹی نا یوتھ ونگ انا ڈل اتون اوڑدہی ٹی گپ وتران کرسا کرے۔ اوپارے کہ پاکستانی قوم تینا مظلوم کشمیری ایلم تا جہد اٹ سیاسی و سفارتی مخ تفی ءِ برجاتخک و اوفتے تنیا ہلیپک۔ اوپارے کہ پاکستانی و کشمیری تا است اسہ ایلو کن خلیک و بھارت تینا جور انا کمک اٹ دا بے مٹ آ مہرو مریبت نا رشتہ ءِ چٹفنگ کپک۔ اوپارے کہ وزیراعظم عمران خان نا کماشی ٹی ساڑی حکومت کشمیر نا ویل ءِ مچ آ دنیا ٹی تالان کرینے ہنداسوب آن بھارت ہبکہ ءِ۔ اینو مچ آ ملک اٹ یوم استحصال پبی وڑاٹ اڈتننگک، نریندر مودی نا گام گیج آتا مذمت و تینا کشمیری ایلم تتون یکجہتی کننگک۔
