فیصل آباد۔ 04 اگست (اے پی پی) پی ٹی آئی نا مرکزی راہشون و بنجائی پارلیمانی سیکرٹری میاں فرخ حبیب و چیئرمین پی ایچ اے و باسک صوبائی اسمبلی چوہدری لطیف نذر پارینے کہ مچ آ قوم اینو یک زبان و یک جان مرسا کشمیری تتون یکجہتی نا درشانی ءِ کیرہ و بھارتی گھیڑ و غاصبانہ کوزہ نا اسہ سال پورو مننگ آ قوم انا چناچنا تینا کشمیری ایلم تے حق خودارادیت ترفنگ کن ریلی تیٹی پبی بشخ ہلیرہ وخت اس کہ سہب انا 10 بجہ غا کشمیری تتون یکجہتی نا درشانی ءِ کننگ و حق خودارادیت نا خاطر اوفتا قربانی تے خراج عقیدت پیش کننگ کن اسہ منٹ اس پورو خاموشی اختیار کننگک نیز پاکستان تون اوار مچ آ دنیا ٹی رہینگوک آ اوورسیز پاکستانی و کشمیریک ہم اینو بھارت نا برخلاف یوم استحصال اڈ ایترہ انتئے کہ اینو نا دے تینا کشمیری ایلم تے باور کرفوئی ءِ کہ او تینا جہد اٹ تنیا افس بلکن غٹ پاکستانی قوم کشمیری تتون سلوک ءُ۔ سے شنبے نادے آ اے پی پی تون گپ وتران اٹ اوپارے کہ کشمیری تا حق خودارادیت نا دوئی کننگ کن بدل مفروک عزم و بڑز حوصلہ ءِ سلام پیش کننگ تون اوار اینو نادے جہاننی برادری ءِ یات دہانی کرفک کہ او اقوام متحدہ نا قرارداد آتے مون آ تخسا کشمیری تے تینا سیاسی آخبت نا تعین نا حق ترفنگ کن تینا کڑد ءِ ادا کے۔ اوپارے کہ کشمیریک جہانی برادری آن داسوج ءِ ہرفنگ کن حق آٹو کہ اقوام متحدہ نا چارٹر نا رداٹ اوفتے بنداوی حق آن انت اکن محروم تخنگ انگ ءِ۔ اوپارے کہ مودی سرکار غیر آئینی و غیر کانودی چم آتے اٹ مقبوضہ کشمیر ءِ دنیا نا غٹ آن بھلا جیل جوڑ کرینے۔ اوپارے کہ بھارت ریاستی ظلم و جور و کشمیرنا آئینی حیثیت ءِ بدل کرسا کشمیری تے آجوئی نا حق آن محروم تخنگ کپک۔ اوپارے کہ 5 اگست نا بھارتی گام گیج آن پن آ جمہوریت نا دعویدار آتا مون انگا دروشم پاش مسنے۔ اوپارے کہ مقبوضہ جموں و کشمیر نا الس تینا آجوئی و بقاء کن جنگ تننگ ءُ و کشمیر تقسیم ہند انا بے پورو آ ایجنڈا ءِ۔
