اسلام آباد۔ 04 اگست (اے پی پی) وزیر خارجہ مخدوم شاہ محمود قریشی پارینے کہ مچ آ قوم چارشنبے نادے 5 اگست آ یکجا مرسا مظلوم کشمیری تتون یکجہتی نا درشانی ءِ کننگ کن یوم استحصال اڈایترہ۔ او سے شنبے نادے آ وزارت خارجہ ٹی 5 اگست نا بابت آن اہم دیوان نا کماشی ءِ کریکہ۔ دیوان اٹ خصوصی کمکار قومی سلامتی معید یوسف، سیکرٹری خارجہ سہیل محمود، بنجائی سیکرٹری حوالکاری اکبر حسین درانی و بڑزکو عسکری کمامدارآک ساڑی ئسر۔ وزیر خارجہ تینا دورہ لین آف کنٹرول چری کوٹ سیکٹر و مظفر آباد نا بابت بشخ ہلوک آتے دیوان آن معلومدار کرے۔ وزیر خارجہ وزیراعظم آزاد کشمیر راجہ فاروق حیدر و صدر آزاد کشمیر سردار مسعود خان تون اوار کشمیر نا سیاسی سرکڑدہ غاتون مروک آ اوڑدہی تا ذکر ءِ کرے۔ اوپارے کہ لین آف کنٹرول آ بھارتی فوج کودک شاری تے گولی تا شست کننگ ءِ، مچ آ کشمیری قوم بھارت نا 5 اگست نا اسہ کنڈی گام گیج آتے مسترد کرینو۔ شاہ محمود قریشی پارے کہ مچ آ قوم 5 اگست آ یکجا مرسا مظلوم کشمیری تتون یکجہتی نا درشانی ءِ کننگ کن یوم استحصال اڈایترہ۔ مظلوم کشمیری تا توار ءِ دنیا نا ہر فورم آ ہرفنہ ہراتم اسکان اوفتا حق خودارادیت اوفتے دوئی مفک۔ دیوان اٹ یوم استحصال نا بابت برانزی لائحہ عمل نا بابت سرجم سلابت ہم کننگا۔
