اسلام آباد۔ 04 اگست (اے پی پی) وزیر خارجہ مخدوم شاہ محمود قریشی پارینے کہ پاکستان ہمووخت اسکان تینا کشمیری ایلم تا مخ تفی ءِ برجاتخک ہراوخت اسکان اوفتے اوفتا روا حق، حق خودارادیت، ملیپک، پاکستان نا مچ آ قوم ، غٹ سیاسی جماعت آک، سیاسی و عسکری سرکڑدہ غاک کشمیر نا باندات آ اسہ وڑنا موقف تخرہ۔ داہیت ءِ او سے شنبے نادے آ کشمیر نا حالیت آتیا وزارت خارجہ ٹی آل پارٹیز کانفرنس نا کماشی ءِ کرسا پارے۔ وزیر خارجہ غٹ سیاسی جماعت آتا راہشون تے بھارت نا غیر کانودی مقبوضہ جموں و کشمیر اٹ برجا انسانی حق انا سنگین خلاف ورزی و ڈیہہ ٹی امن و ایمنی نا حالیت آتا بابت سرجم حوال تس۔ شاہ محمود قریشی پارے کہ غٹ کشمیریک تدوک آ سال 5 اگست آ بھارت نا کنڈآن غیر کانودی مقبوضہ جموں و کشمیر اٹ کروک آ غیر آئینی و اسہ کنڈی گام گیج آتے مسترد کرینو۔ پاکستان بھارت نا غیر کانودی مقبوضہ جموں و کشمیر اٹ برجا انسانی حق انا خلاف ورزی تے ہر جہانی فورم آ پاش کرے۔ وزیر خارجہ پارے کہ بھارت سرکار نا ہندوتوا پالیسی نئے بیرہ کشمیری بلکن مچ آ ڈیہہ نا امن و ایمنی کن گڑتی نا سوب ءِ۔ بھارت، مقبوضہ کشمیر اٹ ڈومیسائل کانود اٹ بدلی کرسا آبادی نا تناسب ءِ بدل کننگ خواہک ہرا جہانی کانود آتا خلاف ورزی ءِ۔ وزیر خارجہ پارے کہ اینو پاکستان نا غٹ سیاسی جماعت آک کشمیر نا ویل آ یکجاءُ۔ آرایس ایس نا سوچ آ روان بی جے پی نا سرکار تینا ہندوتوا سوچ انا سوب نئے بیرہ کشمیری بلکن بھارت نا تہہ ٹی رہینگوک آ اقلیت آتا است اٹ خار ودی کرے۔ بھارت ظلم و جور و قیدوبند انا سختی تیان پدہم کودک کشمیری تا حوصلہ ءِ شیف خلنگ کتو۔ شاہ محمود قریشی پارے کہ اینو مچ آ دنیا نا مون آ بھارت سرکار نا اصل دروشم پاش مسنے، اینو دنیا بھارت نا منافرت پسند پالیسی تے تنقید نا شست کننگ ءِ۔ پاکستان نا مچ آ قوم، غٹ سیاسی جماعت آک، سیاسی و عسکری سرکڑدہ غاک کشمیر نا باندات آ اسہ وڑنا موقف تخرہ۔ وزیر خارجہ پارے کہ پاکستان ہمووخت اسکان تینا کشمیری ایلم تا مخ تفی ءِ برجاتخک ہراوخت اسکان اوفتے اوفتا روا حق، حق خودارادیت ملیپک۔ دیوان اٹ اسپیکر قومی اسمبلی اسد قیصر، چیئرمین سینیٹ صادق سنجرانی، وزیر حوالکاری و شینکاری سینیٹر شبلی فراز، بنجائی وزیر کانود بیرسٹر فروغ نسیم، وزیر امور کشمیر علی امین گنڈاپور، چیئرمین کشمیر کمیٹی شہریار آفریدی، وزیر مملکت پارلیمانی امور علی محمد خان، خصوصی کمکار قومی سلامتی معید یوسف، بنجائی وزیر بین الصوبائی رابطہ ڈاکٹر فہمیدہ مرزا، سینیٹر مشاہد حسین سید، فرخ حبیب، سینیٹر راجہ ظفرالحق، راجہ پرویز اشرف، سید نوید قمر، سینیٹر شیری رحمان، سینیٹر مشتاق احمد، مولانا عبدالاکبر چترالی، ایمل ولی خان، سینیٹر ستارہ ایاز، سینیٹر انوارالحق کاکڑ، سینیٹر مرتضیٰ جاوید عباسی، خواجہ آصف و ایلو راہشونک ساڑی ئسر۔
