اسلام آباد۔ 03 اگست (اے پی پی) پاکستان اٹ کوروناوائرس نا پوسکن آ ناجوڑ و دادین آن مرک آتیٹی اِرا تُو مست انا مقابلہ ٹی کم و ود 80 درسد کمتی ریکارڈ کننگانے۔ داہیت ءِ پنی آ امریکی اخبار وال اسٹریٹ جرنل تینا اسہ رپورٹ اسے ٹی پارینے۔ اخبار لکھانے کہ اِرا تُو مست پاکستان اٹ کوروناوائرس نا تالانی و داڑآن مروک آ مرک آتا کچ بھاز زیات ئس ولے داناجوڑی نا تالانی و داڑآن مروک آ مرک آتا کچ اٹ ڈرامائی کمتی بسنے۔ پاکستان نا غٹ آن بھلا شار کراچی تون اوار ملک انا بھلا ہسپتال آتیٹی کوروناوائرس آن زہمی ناجوڑ آتیکن جتا کٹ خورک مننگ ءِ ہنداوڑ تدوک آ اسہ تُو انا وخت اٹی وینٹی لیٹر آتیا ہنوک آ ناجوڑ آتا کچ نیمہ غان کم مسنے۔ اخبار لکھانے کہ تینا دے ٹکی و دیکی ہمسایہ ملک بھارت و ایران نا مقابلہ ٹی پاکستان اٹ کوروناوائرس نا ناجوڑ آتا کچ اٹ کمتی مون آ بسنے، ایران و بھارت اٹ دین انا تالانی ٹی ودکی مسنے۔ اخبار لکھانے کہ وزیراعظم عمران خان جہانی ادارہ جان جوڑی نا کنڈآن پورو لاک ڈاؤن نا مشورہ نا مخالفت ءِ کرے و دا موقف ءِ اختیار کرے کہ پورو لاک ڈاؤن راج انا نیزگار و نزور تپہ و زرگزران کن بے کچ نسخان دہ ءِ۔
