اسلام آباد۔ 03 اگست (اے پی پی) تدوک آ 24 گھنٹہ ٹی کورونا نا 330 ناجوڑ آتا ٹیسٹ مثبت بس وخت اس کہ تدوک آ 24 گھنٹہ ٹی 8 بندغ زوال کریر ہرافتیان 7 بندغ ہسپتال آتیٹی و اسہ ناجوڑ اس اُراٹی قرنطینہ ٹی زوال کرے۔ نیشنل کمانڈ اینڈ آپریشن سینٹر نا کنڈآن جاری پوسکن آ رپورٹ نا رداٹ تدوک آ 24 گھنٹہ ٹی 11 ہزار 26 کورونا نا ٹیسٹ کننگا ہرافتیان سندھ اٹی 5 ہزار 272، پنجاب اٹی 3 ہزار 554، خیبر پختونخوا ٹی 648، اسلام آباد اٹی اسہ ہزار 271، بلوچستان اٹی 105، گلگت بلتستان اٹی 84و آزاد کشمیر اٹی 92 ٹیسٹ کننگا۔ داتم اسکان مچ آملک اٹی کوویڈ۔ 19 آن دراخ جوڑ مروک آتا کچ 2 لکھ 48 ہزار 873 مسنے۔ آزاد کشمیر، گلگت بلتستان و بلوچستان اٹی کورونا نا اسہ ناجوڑ اس ہم وینٹی لیٹر آاف، وخت اس کہ مچ آ ملک اٹی کوویڈ۔ 19 ناجوڑ آتیکن جتا اسہ ہزار 859 وینٹی لیٹر آتیا 213 ناجوڑ ءُ، داوخت آ مچ آ ملک اٹی کوویڈ۔ 19 نا ایکٹو کیس آتا کچ 25 ہزار 172ءِ۔ داتم اسکان مچ آ ملک اٹی کوویڈ۔ 19 نا ناجوڑ آتا کچ 2 لکھ 80 ہزار 29 ءِ ہرافتیان آزاد کشمیر اٹی 2 ہزار 93، بلوچستان اٹی 11 ہزار 774، گلگت بلتستان اٹی 2 ہزار 180، اسلام آباد اٹی 15 ہزار 76، خیبر پختونخوا ٹی 34 ہزار 223، پنجاب اٹی 93 ہزار 197و سندھ اٹی اسہ لکھ 21 ہزار 486ناجوڑ ءُ۔
