مظفرآباد۔ 03 اگست (اے پی پی) وزیر خارجہ شاہ محمود قریشی دوشنبے نادے آ آزاد کشمیر نا دورہ ءِ کرے۔ داٹی او وزیراعظم ہاؤس آزاد کشمیر نا دورہ ءِ ہم کرے۔ وزیراعظم نا خصوصی کمکار قومی سلامتی معید یوسف ہم وزیر خارجہ تون اوار ئس۔ وزیراعظم آزاد کشمیر راجہ فاروق حیدر خان وزیر خارجہ شاہ محمود قریشی ءِ وزیراعظم ہاؤس اٹ بخیر کرے۔ وزیر خارجہ مخدوم شاہ محمود قریشی وزیراعظم آزاد کشمیر راجہ فاروق حیدر خان تون اوڑدہی کرے۔ اوڑدہی ٹی مقبوضہ جموں و کشمیر نا حالیت و 5 اگست آ یوم استحصال نا لائحہ عمل نا بابت گپ وتران کریر۔ وزیر خارجہ پارے کہ مچ آ پاکستانی قوم مشکل نا داساہت اٹ تینا کشمیری ایلم تتون سلوک ءُ۔ مخدوم شاہ محمود قریشی پارے کہ بھارت نا پدریسہ ظلم و جور و دباؤ آن پد ہم 5 اگست نا غیر کانودی گام گیج آتے غٹ کشمیریک مسترد کرینو۔ مظلوم و کودک کشمیری تا توار ءِ دنیا نا ہر فورم آ ہرفنہ۔ وزیراعظم راجہ فاروق حیدر پارے کہ کودک کشمیریک دنیا نا چارمیکو بھلا فوجی واک انا ڈٹ کر مقابلہ ءِ کننگ ءُ، پاکستانی قوم انا کنڈآن کشمیری تتون یکجہتی نا بے مٹ درشانی آ اوفتے سلام پیش کینہ۔ پاکستان کشمیری تا مچ آ دنیا ٹی اسٹ انگا وکیل ءِ۔ وزیراعظم آزاد کشمیر پارے کہ کشمیریک تینا آخبت ءِ مملکت خداداد پاکستان تون گنڈانو۔ وزیر خارجہ نا بڑزکو کہول انا ڈل انا لین آف کنٹرول و آزاد کشمیر نا دورہ نا پبی ستاءِ کینہ داڑآن آزاد کشمیر آن ایپار جوان ءُ کلہو اس ہنا۔
