اسلام آباد ۔ 31 جولائی (اے پی پی) وزیر ءِ درئی کار شاہ محمود قریشی ءَ یک رند ءِ پد ءَ شاھیگان کت کہ کشمیر ءِ بابت ءَ سرجمیں راج یک مشت انت، کشمیر ءِ جیڈھ ءِ سر ءَ سفارتی کوشست گیش ترند کناں، مئے آیوکیں منزل سری نگر انت، نوں ایش سک باز گستا ءُ دور نہ انت، کشمیری آں گوں یکوئی درشان کنگ ءِ واستہ “یوم استحصال” برجم داراں، سہب ءِ 10 بج ءَ سرجمیں ملک ءُ آزات کشمیر ءَ یک منٹے ءِ واستہ ھاموشی برجم دارگ بیت، لاک ڈائون ءَ چہ پد دگنیا ءَ را نوں سما کنگ لوٹ ایت کہ یک سالے ءِ کیز ءَ کشمیر ءِ مردم آں چتور سما کتگ۔ ٹوھیں جمہورتی ءِ بھارتی لکا بی جے پی ءَ سہرا کتگ، بھارت مرچی میاں اوستمانی تک ءَ ایوک انت۔ مرچی میاں اوستمانی تک ءَ شائنگ انڈیا نوں برننگ انڈیا جوڑ بوتگ۔ آدینگ ءِ روچ ئَ وزیر ءِ اھوالکاری ءُ شنگ کاری شبلی فراز ءُ ھاسیں کمکار معید یوسف ءِ ھمبراھی ءَ کشمیر ءِ ھوالگ ئَ پریس کانفرنس ءَ گوں گشتانک دیان ءَ وزیر ءِ درئی کار شاہ محمود قریشی ءَ گوشت گوستگیں سال 5 اگست ءَ بھارت ءَ مقبوضہ کشمیر ءَ کشمیری آناں اقلیت ءِ تہ ءَ مٹ کنگ ئِ واستہ گیر کانودی گامگیج کنان ءَ دمگ ءَ را سئے بھر آنی تہ ءَ کپ کنگ ءِ کوشست کتگ ایشرا اچبر کشمیری الس آں نہ من اتگ۔ بھارتی گامگیج ءِ مول ءُ مراد کشمیری آناں بھر ءُ بانگ کنگ بوتگ۔ وزیر ءِ درئی کار ءَ گوشت کہ 5 اگست 2019 کشمیری آنی جہد ءُ کوشست ءِ نوکیں گیشی یے روچ انت۔ آئی ءَ گوشت کہ 5 اگست ءَ سہب ءَ یک منٹ ءَ ھاموشی ءَ چہ پد اسلام آباد ءَ صدر مملکت ڈاکٹر عارف علوی ءِ سروکی ءَ یکوئی مارچ بیت۔ صوبائی دارالحکومت آنی تہ ءَ ھم یکوئی مارچ بیت وھدیکہ مظفر آباد ءَ ھم مارچ بیت ایشی یے سروکی ءَ صدر ءُ مزن وزیر آزات کشمیر کن انت۔
