لاہور۔ 30 جولائی (اے پی پی) گورنر پنجاب چوہدری محمد سرور تون داڑے بنجائی وزیر حوالکاری و شینکاری سینیٹر شبلی فراز اوڑدہی کرے ہراٹی سیاسی و حکومتی باندات آتون اوار ایلو باندات آتیا گپ وتران کننگا۔ گورنر پنجاب حکومتی گام گیج آتے پبی وڑاٹ تالان کننگ آ سینیٹر شبلی فراز نا کارکڑد انا ستاءِ کرے۔ گورنر ہاؤس لاہور اٹ مروک آ اوڑدہی ٹی الس ءِ ریلیف کن حکومتی گام گیج و کورونا غان ودی مروک آحالیت آتون اوار ایلو باندات آتابارواٹ ہم گپ وتران کننگا۔ اوڑدہی ٹی گورنر پنجاب چوہدری محمد سرور حکومتی گام گیج آتے گچین وڑاٹ تالان کننگ آبنجائی وزیر حوالکاری شبلی فراز نا کارکڑد انا ستاءِ کرسا پارے کہ تحریک انصاف نا حکومت نئے بیرہ پاکستان ءِ زرگزرانی ویل آتیان نجات تننگ ءِ بلکن السءِ ہم ہربشخ اٹ زیات آن زیات ریلیف تننگ کن گام گیج کننگ ءِ۔ اوپارے کہ احساس پروگرام کون آ ڈٹ حکومت نا الس دوستی نا شاہدی ءِ۔ گورنرپارے کہ اپوزیشن الس ءِ ریفنگ کن ہڑدے پوسکن ءُ ڈٹ اس جوڑ کیک ولے الس نا مون آ اوفتا اصل عزم پاش مسنے، و داہیت اٹی ہچ ءُ شک اس اف کہ الس اپوزیشن نا بیانیہ تون آخا بلکن حکومتی پالیسی تتون سلوک ءُ۔ اوپارے کہ وزیراعظم عمران خان سمجھوتہ کروک اُس اف بلکن اصول آتیا سخت سلوک ءُ راہشون اسے۔ اوپارے کہ 22 کروڑ پاکستانی ملک اٹ احتساب نا مخ تف ءُ و بے پرخ احتساب ملکی شونداری و شونہالی نا ضامن ءِ۔ اوپارے کہ نن انشاء اللہ قومی وسیلہ غاتا پورو رکھ ءِ کینہ و قومی خزانہ غان اسہ اسہ پاولی ءِ ملکی شونداری و شونہالی آ خڑچ کننگک۔ چوہدری محمد سرور پارے کہ وزیراعظم عمران خان نا کماشی ٹی حکومت ملک ءِ زرگزرانی وڑاٹ سوگو کننگ کن عملی گام گیج کننگ ءِ۔ اوپارے کہ کورونا نا تالانی ءِ توننگ کن سمارٹ لاک ڈاؤن نا حکومتی گام گیج گچین پک مسنے اگہ الس عئید و محرم اٹ ایس او پی تیا عمل کریر تو انشاء اللہ نن کورونا ءِ شکست ایتنہ۔ بنجائی وزیر شبلی فراز پارے کہ ساڑی حکومت ہر کہول آ شفافیت و میرٹ ءِ پک کننگ ءِ سفارشی کلچر چٹانے اپوزیشن نا انت ءِ منشاءِ کرسا کے ملک اٹ لس گچین کاریک تینا وخت آمریرہ۔ اوپارے کہ کرپشن کروک آتے ہرحال اٹ احتساب تون مون تروئی تمک اپوزیشن نا ایجنڈا بیرہ جند انا فائدہ غاتا رکھ ءِ اوفتے ملک و قوم انا فکر اف۔
