اسلام آباد۔ 30 جولائی (اے پی پی) وزیراعظم نا خصوصی کمکار قومی سلامتی امور ڈاکٹر معید یوسف پارینے کہ بھارت نا کنڈآن 5 اگست آ مقبوضہ کشمیر نا آئینی حیثیتءِ چٹفنگ، مرغن انگا فوجی گٹ و ظلم و بربریت آ 5 اگست ءِ یوم استحصال نا وڑاٹ اڈتننگک، 5 اگست آ وزیراعظم عمران خان آزاد وجموں کشمیر نا دورہ ءِ کیک۔ دادے آ مچ آ ملک اٹ بھارتی بیدادی نا پبی مذمت کن خصوصی دود و ریلی اڈتننگک، بھارتی فوجی کشمیری تے قتل کننگ، پیلٹ گن آتا کاریم اٹ اتنگ و جبری بے گواہ کننگ اٹ اوار ءِ۔ او تدوک آ دے وزارت حوالکاری وشینکاری نا کنڈآن پاکستان اٹ تعینات دنیا نا چندی ملک آتا پریس قونصلر، اتاشی و درملکی میڈیا نا نمائندہ غاتون ‘‘کشمیری تا اومیت’’ نا سرحال آن انٹرایکٹوسیشن آن تران کریکہ۔ بنجائی سیکرٹری حوالکاری و شینکاری اکبر حسین درانی، ایم ڈی اے پی پی طارق محمود خان آن بیدس وزارت حوالکاری و شینکاری نا کمامدارآک دود اٹی ساڑی ئسر۔ وزیراعظم نا خصوصی کمکار ڈاکٹر معید یوسف پارے کہ ننا حکومت و وزیراعظم عمران خان داہیت آ یخین تخک کہ دنیا ءِ حقیقت نا بایدے معلوم مرے،م دنیا حقیقت آ باور کیک۔ اسہ ملک اسے ٹی ہم انسانی حق آتا خلاف ورزی نا موکل اف، ولے مقبوضہ کشمیر اٹی انسانی حق انا سنگین خلاف ورزی مننگ ءِ۔ اوپارے کہ پاکستان مقبوضہ کشمیر نا معاملہ ءِ دنیا نا مون آ تخا تانکہ جہانی برادری دا معاملہ ءِ خڑک آن ہرے۔ اوپارے کہ 5 اگست 2019ء نا بھارتی غیر کانودی ایکشن ءِ اسہ سال اس پورو مسنے، اسہ سال مست مقبوضہ کشمیر ناآئینی حیثیت ءِ چٹفنگا، مقبوضہ کشمیر نا گیشتری ءِ اقلیت اٹ بدل کننگ و اوفتا نسل کشی برجاءِ۔ کشمیری تے جیل تیا گدریفنگ انگ ءِ، مصنوعی سیاسی سرجزکننگ انگ ءِ تانکہ دنیا نا چکار ءِ اسہ کنڈ کننگے۔ اوپارے کہ بھارت آن ریکارڈ پارے کہ ہزار آ ودکی فوجی مقبوضہ کشمیر آ گدریفینے، دابھارتی فوجی کشمیری تے قتل کننگ، پیلٹ گن آتا کاریم اٹ اتنگ و جبری بے گواکننگ اٹ اوار ءُ۔ اوپارے کہ بھارت کوروناوائرس نا آڑاٹ مقبوضہ کشمیر اٹ ظلم انا انتہاکرینے، جہانی برادری ءِ داسہ بیدار مننگ نا گرج ءِ۔ اوپارے کہ 5 اگست ءِ یوم استحصال نا وڑاٹ اڈتننگک، اسہ سال اس مست دادے بھارت پوسکن ءُ بیدادی و کوزہ نا پوسکن ءُ وڑوڈول اس بناکریسس۔ اوپارے کہ اولیکو وار جہانی کہول آ پاکستان کشمیر نا ویل ءِجہانی کہول آ تالان کرینے، وزیراعظم عمران خان کشمیری تا وکیل و سفیر مرسا دنیا ٹی ہنا و پارے کہ کشمیر اٹ امر انسانی حق انا سنگین خلاف ورزی مننگ ءِ۔ اوپارے کہ پاکستان کشمیری تا حق خودارادیت نا دوئی کننگ اسکان ہروڑنا مخ تفی ءِ برجاتخک۔
