اسلام آباد۔ 30 جولائی (اے پی پی) وزیراعظم عمران خان نا کم کٹیا کروک تپہ ءِ جند انا اُراتا قابل کننگ نا تصور ملک اٹ بھلو کچ اسے ٹی ملازمت ناوارخواہی و تعمیرات تون تعلقدار صںعت اٹ زرگزرانی سرجز آتے زبردست مون آ درینے۔ وزیراعظم تینا دا تصور نا رداٹ تعمیرات نا بشخ و زرگزران نا بحالی کن پاکستان نا تاریخ نا غٹ آن بھلا ہاؤسنگ نا بشخ انا پیکج نا پڑو ءِ کرینے۔ داڑآن نئے بیرہ تحریک انصاف نا حکومت نا 50 لکھ اُراتا تفنگ نا وعدہ پورو مریک بلکن 50 نا خڑک بشخ آتیٹی سرجزآتیٹی ودکی مریک۔ وزیراعظم غریب آ بندغ آتیکن 30 ارب روپئی نا پیکج ناپڑو ءِ ہم کرینے و پوکستان آ پاکستان ہاؤسنگ پروگرام نا رداٹ جوڑ کروک آ بنائی اسہ لکھ اُراتیا 3 لکھ روپئی نا سبسڈی تننگک۔ داپروگرام نارداٹ 5 مرلہ اُراتا تفنگ آ بینک آن وام آ 5 درسد شرح سود وخت اس کہ 10 مرلہ غا 7 درسد نا شرح سود وام تننگک۔ اسٹیٹ بینک و ایلو بینک آتے پاننگانے کہ او تعمیراتی بشخ اکن 5 درسد جتا کیر۔ دادے پین آسان کننگ کن پوسکن آ پاکستان ہاؤسنگ اتھارٹی نا رداٹ غٹ صوبہ غاتیٹی ون ونڈو آپریشن نا بناءِ کننگانے۔ چندی مشکل آتا ازالہ کن قومی رابطہ کمیٹی اس ٹہیفنگانے۔ داکان بیدس صوبہ غاتیٹی خراج آتیٹی کمتی اتنگانے و این او سی ءِ آسان کننگانے۔ زرکار آتے اسہ بھلو رعایت تننگانے کہ اوفتیان 31 دسمبر 2020 اسکان اوفتا زرکاری آ کٹیا نا ذریعہ ءِ ہریفنگپننگک۔ وزیراعظم عمران خان جولائی نا بناآ ہاؤسنگ و تعمیرات آ پوسکن آ جوڑ کروک آ قومی رابطہ کمیٹی نا دیوان آن پد تعمیراتی بشخ انابحالی نا ڈٹ ءِ جوڑ کرے۔ پوسکن آ پاکستان ہاؤسنگ اسکیم نا رداٹ تعمیراتی سرجز آتیا 90 درسد خراج ءِ ہلنگانے۔ جنرل سیلز خراج ءِ 15 درسد آں کم کرسا دودرسد کرے و تعمیراتی میٹریل آ ودہولڈنگ خراج آتے چٹفینے۔
