اسلام آباد۔ 30 جولائی (اے پی پی) وزیراعظم بجلی و گیس اناصارف آتیکن بے المی ویل ودی کروک آ و وڈی خوری نا مرتکب زموار آتا برخلاف سخت کارروائی کننگ نا پارت کرسا پارینے کہ توانائی نا بشخ اٹ اصلاحات زرگزران نا سوگوی کن المی ءِ، انتظامی خامی، دُزی، وڈی خوری و ایلو ویل آتا مچ آ بھاریم الس ءِ سگوئی تمک، دادے اسُل امنا کپنہ۔ اوداخیال آتا درشانی ءِ پنچ شنبے نادے آ داڑے توانائی نا بشخ اٹ اصلاحات نا بابت اسہ دیوان نا کماشی ءِ کرسا ءِ کرسا کرے۔ دیوان اٹ بنجائی وزیر توانائی عمرایوب خان، وزیر ڈٹ بندی اسدعمر، خصوصی کمکار ندیم بابر و شہزاد قاسم و ایلوکمامدارآک بشخ ہلکر۔ وزیراعظم آفس نا میڈیا ونگ انا رداٹ وزیراعظم ءِ توانائی نا بشخ اٹ برجااصلاحاتی عمل، ملکی گرج آتا رداٹ بجلی نا پیداوار، فراوانی و بشخنگ نا نظام ءِ پوسکن آ وڑوڈول آتیا اتنگ، گیس انا بشخ اٹ اصلاحات و توانائی نا بشخ انا متکن آ ویل آتا ایسری نا بابت سرجم حوال تننگا۔ وزیراعظم دیوان آن تران کرسا پارے کہ توانائی نا بشخ اٹ اصلاحات ملکی زرگزران نا سوگوی کن بے حد المی ءِ۔ اوپارے کہ توانائی نا بشخ اٹ ساڑی انتظامی خامی، دُزی ، وڈی خوری و ایلو ویل آتا مچ آ بھاریم الس ءِ سگوئی تمک، ہرادے اسُل امنا کپنہ۔ وزیراعظم پارت کرے کہ توانائی نا بشخ اٹ اصلاحاتی لائحہ عمل آ تخوک آ ٹائم لائن آتون عملدرآمد کن ایکشن پلان اس جوڑ کننگے۔ وزیراعظم بجلی و گیس انا بشخ اٹ صارف آتیکن بے گرج ویل ودی کروک آ و وڈی خوری نا مرتکب زموار آتا بابت پارت کرے کہ داوڑنا زموار آتا برخلاف سخت کارروائی ءِ پک کننگے۔
