اسلام آباد۔ 30 جولائی (اے پی پی) وزیراعظم عمران خان پارینے کہ کاروباری برادری تعمیراتی بشخ اٹ زرکاری کے، حکومت ہروڑنا کمک فراوان کیک۔ داخیال آتا درشانی ءِ او نیشنل کوآرڈینیشن کمیٹی ہاؤسنگ، کنسٹرکشن اینڈ ڈویلپمنٹ نا ہفتہ واردیوان نا کماشی ءِ کرسا کرے۔ دیوان اٹی ایسوسی ایشن آف بلڈرز اینڈ ڈویلپرز آف پاکستان (آباد) نا 13 نمائندہ ویڈیو لنک انا کمک اٹ بشخ ہلکر۔ دیوان اٹی تعمیراتی بشخ اٹ حکومت نا کنڈآن تروک آ آسراتی و اوٹی بناکروک آ سرجزآتا پیش رفت نا سرجم جاچ ءِ ہلنگا۔ دیوان اٹی ساڑی ایسوسی ایشن آف بلڈرز اینڈ ڈویلپرز آف پاکستان (آباد) نا نمائندہ غاتا کنڈآن تعمیرات نا بشخ اٹ حکومت نا کنڈآن تاریخی آسراتی و آسانی فراوان کننگ آ وزیراعظم ءِ خراج تحسین پیش کننگا۔ آباد نا نمائندہ غاک گپ وتران کرسا پاریر کہ ملکی تاریخ اٹ اولیکو وار نجی بینک آتا کنڈآن تعمیراتی سرجز آتیکن بلڈرز اینڈ ڈویلپرز نا است بڈی ءِ کننگ انگ ءِ ہرانا کریڈٹ ساڑی حکومت و اسٹیٹ بینک ءِ کاہک۔ این او سی و موکل نامہ غاتا عمل ءِ آسان کننگ آن تعمیراتی بشخ اتون وابستہ کاروباری برادری نا است بڈی مسنے۔ دیوان اٹ ساڑی آبادنا13نمائندہ غاتا کنڈآن بروک آ تُو آن چار تُو اٹی چندی ڈٹ بناکننگ نا باوری ہراٹی 1370 ارب روپئی نا زرگزرانی سرگرمی ودی مریک۔ دا ڈٹ آتیٹی اسہ لکھ نا خڑک ہنکینی یونٹ آتا تعمیر ہم اوار ءِ۔ آباد نا کنڈآن تعمیراتی بشخ اٹ تروک آ آسراتی تا پبی فائدہ ہرفنگ و ارب آ روپئی نا زرگزرانی سرجزآتا بناءِ کننگ نا باوری آ وزیراعظم است جمی نا درشانی ءِ کرے۔ تعمیرات نا بشخ انا بابت وزیراعظم نا وژن ءِ عملی دروشم اس تننگ و ڈویلپرز و بلڈرز آتیکن آسانی فراوان کننگ نا بابت صوبہ پنجاب و صوبہ خیبر پختونخوا نا کنڈآن اہم پیش رفت مسنے۔
