کوئٹہ۔ 29 جولائی (اے پی پی) بلوچستان عوامی پارٹی نا مرکزی راہشون و صوبائی وزیر پی ایچ ای/واسا حاجی نور محمد دمڑ بلوچستان اٹ ان ہاؤس بدلی و وزیراعلیٰ جام کمال نا برخلاف تحریک بے پتی نا ہوکاتے مسترد کرسا پارے کہ مخلوط صوبائی حکومت تینا قائد ایوان جام کمال خان نا کماشی ٹی پنچ سال ءِ پورو کیک۔ اپوزیشن جماعت آک تینا کارندہ غاتے دلاسہ ترفنگ کن ہر تُو مائنس ون فارمولا و تحریک بے پتی نا شوشاکیرہ، بلوچستان عوامی پارٹی نا پارلیمانی پڑک تینا قائد ایوان جام کمال خان نا کماشی ٹی یکجاءُ، اولیکو وار بنجائی پی ایس ڈی پی ٹی بلوچستان کن 83 ارب روپئی نا پروجیکٹ تخنگانے، صوبائی اسمبلی نا نشست آتیٹی ودکی چیئرمین سینیٹ محمد صادق سنجرانی و بلوچستان عوامی پارٹی نا سینیٹر آتا کوشست آتا سوب آن ممکن مس۔ داہیت ءِ او چارشنبے نادے آ ایسوسی ایٹڈ پریس آف پاکستان تون اسہ خصوصی ءُ انٹرویو اسے ٹی پارے۔ صوبائی وزیر پی ایچ ای/واسا حاجی نور محمد دمڑ پارے کہ صوبائی حکومت نا اِراسال انا کارکڑد مستین نا حکومت آتیان بھاز جوان ءِ، کوروناوائرس نا چیلنج اتون مون تننگ کن حکومت این ڈی ایم اے و انتظامیہ تون اواری اٹ گچین گم گیج کرےو بجٹ اٹ غٹ ضلع غاتے کن اسہ وڑ بنداو تیا ڈٹ تخنگانے ہنداخاطرآن صوبہ نا قوم پرست و مذہبی جماعت آتا پلیٹ فارم آن سیاست کروک آ سیاسی کارندہ غاک بلوچستان نا شونداری و شونہالی کن وزیراعلیٰ جام کمال نا دوتے سوگو کرسا بلوچستان عوامی پارٹی ٹی شمولیت اختیار کیر۔ اوپارے کہ وزیراعلیٰ جام کمال خان بنجائی حکومت تون گچین ریلیشن شپ اس جوڑکرسا بلوچستان نا مقدمہ ءِ ہرفورم آ جوان وڑاٹ کرے، زیارت و ہرنائی کن بنجائی پی ایس ڈی پی ٹی 18 ارب روپئی رپلیکٹ مسنے، اوپارے کہ پاک چین اقتصادی راہداری ڈٹ انا دیکی روٹ آ سیاست کروک آ قوم پرست پارٹیک تینا دور اقتدار اٹ سی پیک ڈٹ آ الس ءِ تہاری تیٹی تخار داسہ بلوچستان عوامی پارٹی و وزیراعلیٰ بلوچستان جام کمال نا کوشست آتیان پاک چین اقتصادی راہداری ڈٹ انا دیکی روٹ انا کچلاک آن ژوب اسکان روٹ انا 65 ارب روپئی نا ٹینڈر مسنے ہراڑآ سی پیک اتھارٹی نا چیئرمین لیفٹیننٹ جنرل (ر) عاصم سلیم باجوہ نا منت وار ءِ۔ اسہ سوج اسے نا ورندی ٹی صوبائی وزیر پی ایچ ای واسا حاجی نور محمد دمڑ پارے کہ بلوچستان اسمبلی نا 65 آن 85 نشست آتا بل ایوان بالا غان منظور مسنے ہرا قومی اسمبلی آن منظوری آن پد باضابطہ وڑاٹ نافذ العمل مریک ہراڑآن بلوچستان اسمبلی نا نشست آتیٹی ودکی اتون مر مر انگا علاقہ غاتا الس نا اسمبلی ٹی گچین نمائندگی مریک۔
