اسلام آباد۔ 29 جولائی (اے پی پی) وزیراعظم نا خصوصی کمکار امور نوجوانان عثمان ڈار پارینے کہ 9 اگست آ شجرکاری مہم اٹی ریکارڈ دہ لکھ درخت خلنگک، پارلیمنٹ نا باسک آک، ورناک و غٹ پاکستانیک زیات آن زیات داٹی بشخ ہلیر، مسلم لیگ (ن) ءِ مناظرہ نا چیلنج کیوہ کہ ساڑی دور حکومت اٹ سرسہب ورناپروگرام میرٹ و شفافیت آ مبنی ءِ وخت اس کہ مستین من پسند بندغ آتے لیپ ٹاپ و وام تننگاکہ، اپوزیشن وزیراعظم عمران خان نا ہرگام گیج ءِ شیف خلیک ولے دنیا اونا گام گیج آتے امنا کننگ ءِ۔ داخیال آتا درشانی ءِ او چارشنبے نادے آ پنجاب انفارمیشن ٹیکنالوجی بورڈ انا کنڈآن وزیراعظم ٹائیگر فورس انا منشاکار آتیکن تیار کروک موبائل ایپ انا بناءِ کننگ آن پد پریس کانفرنس آن تران کرسا کرے۔ اوپارے کہ موبائل ایپ انا کمک اٹ ورنامنشاکارآک وزیراعظم ٹائیگر فورس اٹ رجسٹرڈ مننگ کیرہ، منشاکارآک دا ایپ انا کمک اٹ کورونا غان بچنگ نا ایس او پی تا خلاف ورزی نا پیدواری ءِ کننگ کیرہ وخت اس کہ داٹی گرین سیلفی نا فیچر ہم ساڑی ءِ، او نیال اس خلسا داٹی تینا عکس ءِ ہم مون تننگ کیرہ، شجرکاری مہم اٹ ریکارڈ درخت خلنگ کن ٹائیگر فورس ءِ اوار کننگ انگ ءِ۔ وزیراعظم اسہ دے اٹی زیات آن زیات نیال خلنگ نا ریکارڈ اس جوڑ کننگ نا پڑو ءِ کرینے۔ اوپارے کہ 9 اگست آ ٹائیگر فورس ڈے ءِ اڈتننگ نا فیصلہ کننگانے، دادے آ بھلو کچ اسے آ شجرکاری مہم نابناءِ کننگک، 9 اگست آ وزیراعظم نا کماشی ٹی ریکارڈ شجرکاری کننگک، اسہ دے اٹی غٹ آن زیات 10 لکھ نیال خلنگک، خیبر پختونخوا حکومت 5 لکھ درخت خلنگ نا زمواری ءِ ہلکونے، مہالو ہم خیبر پختونخوا حکومت اسہ ارب درخت خلکونے۔ اوپارے کہ وزیراعظم عمران خان براہ راست شجرکاری مہم نا چاروکی ءِ کننگ ءِ۔، اوپارے کہ صوبائیت و سیاست آن ایڑترمرسا ورناک داقومی مہم اٹ بشخ ہلیر۔ وزیراعظم عمران خان تینٹ منشاکارآتون اواری اٹ مہم اٹ بشخ ہلیک۔ اووزیراعلیٰ سندھ آن خواست کرے کہ او سندھ انا ٹائیگر فورس انا منشاکار آتا خذمت ءِ ہلنگ نا بابت تینا فیصلہ غا نظرثانی کے، صوبہ سندھ آن اسہ لکھ 54 ہزار ٹائیگر فورس انا منشاکار آک رجسٹریشن کرفینو، ولے سندھ حکومت اوفتا خذمت آتے دوئی کتو، گورنر سندھ احساس کیش سینٹرو یوٹیلیٹی اسٹورتیا اوفتا خذمت آتیان فائدہ ہرفینے، اگہ سندھ حکومت دامنشاکارتا خذمت ءِ ہلککہ تو اینو کراچی نا ہراحالیت ءِ داٹی ٹائیگر فورس انا منشاکار آک کمک کریرہ، نن خوانہ کہ سندھ ہم سرسوز مرے۔ اوپارے کہ اپوزیشن اولی دے آن ٹائیگر فورس انا مخالفت ءِ کننگ ءِ و دانا برخلاف چم بازی کننگ ءِ۔ اوپارے کہ احسن اقبال و ایلو اپوزیشن نا راہشونک سوج کریرہ کہ ٹائیگر فورس ہراڑے کن ءِ، اوفتا ہوم گراؤنڈ نارووال اٹ ٹائیگر فورس انا غٹ آن بھلا کنونشن مس ولے اوبٹنگ انگ آن پد ہم داٹی بتوس۔ خصوصی کمکار پارے کہ اپوزیشن ءِ ہراتم وزیراعظم عمران خان ءِ شیف خلنگ کن ہچ اس ملپننگ ءِ تو ٹائیگر فورسءِ شیف خلیرہ، عثمان ڈار پارے کہ سیالکوٹ اٹ خواجہ آصف ءِ ٹائیگر فورس انا کماشی ءِ پارین ولے اوہم مون آ بتوو بیرہ اونا برخلاف بیان بازی کننگ ءِ۔ اوپارے کہ 10 لکھ ورناک بے معاوضہ قومی خذمت کن تینا خذمت آتے پیش کرینو، دافتے کن ماسک، جیکٹ پین پین کن ٹیکس تروک آتا اسہ روپئی اسے ہم خڑچ کننگتو بلکن سخیک داگڑاتا فراوانی ٹی کمک کریر۔ اسہ سوج اسے نا ورندی ٹیی اوپارے کہ مہالو منشاکار فورس ءِ انتظامیہ نا پارت آ تعینات کننگاکہ ولے ورناک ہراغاو تے ضلعی انتظامیہ غا گدریفیرہ اوفتا بارواٹ معلوم متوکہ کہ اوفتیا اخہ عمل مسنے ولے دا ایپ انا کمک اٹ اوفتا غاوتیا عملدرآمد نا جاچ ءِ ہم ہلنگ مریک، اواپوزیشن ءِ چیلنج ترسا پارے کہ ساڑی حکومت اٹ سرسہب ورناپروگرام میرٹ و شفافیت آٹی ءِ وخت اس کہ مستین من پسند بندغ آتے لیپ ٹاپ و وام تننگا۔ اوپارے کہ شہباز شریف ماسک خلسا لیپ ٹاپ آ پریس کانفرنس کرسا ہنا۔ ہراتم او اُراٹی خاموش تولوک ئس تو ہمووخت آ ٹائیگر فورس انا منشاکار آک السی خذمت اٹ اختہ ئسر۔ اپوزیشن نا راہشونک کوروناٹی اسہ ہسپتال اسے نا ہم دورہ ءِ کتوس۔ اوپارے کہ اپوزیشن وزیراعظم عمران خان نا ہرگام گیج ءِ شیف خلیک ولے دنیا اونا گام گیج آتے امنا کننگ ءِ۔
