لاہور۔ 29 جولائی (اے پی پی) وزیراعلیٰ پنجاب سردار محمد عثمان بزدار تون بنجائی وزیر حوالکاری وشینکاری سینیٹر شبلی فراز اوڑدہی کرے ہراٹی تین پہ تینی است خواہی نا باندات، سیاسی حالیت و میڈیا حکمت عملی آ گپ وتران کننگا۔ اوڑدہی ٹی الس ءِ ریلیف تننگ نا گام گیج و شرحالی نا ڈٹ آتیا ہم سجفنگا۔ وزیراعلیٰ پنجاب سردار عثمان بزدار حکومتی کارکڑد انا بابت گام گیج آتے پبی وڑاٹ تالان کرسا پارے کہ حکومت نا 2 سال انا کارکڑد مستین نا 30 سال انا دورغان بھاز گچین ءِ، حکومتی گام گیج آتے گچین وڑاٹ الس نا مون آ اتنگ کن میڈیا نا کڑد کلیدی اہمیت تخک۔ اوپارے کہ میڈیا نا تعمیری تنقید آن راہشونی ملک۔ کرپٹ زموار آتا بے پرخ احتساب پاکستان نا شونداری و شونہالی نا ضامن ءِ، قومی وسیلہ غاتا غلط کاریم اٹ اتنگ نا مسکوہی روایت ءِ چٹفینن۔ اوپارے کہ اپوزیشن جماعت آتا اواری بیرہ جند انا فائدہ غاتا رکھ اکن ءِ، عثمان بزدار پارے کہ دا زموار آک تینا وڈی خوری نا داغ ءِ ڈکنگ نا بے سہب کوشست کننگ ءُ، اے پی سی نا پوفانک آن زوت ہواپیش تمک۔ اوپارے کہ 22 کروڑ الس چارہ کہ اینو ملک اٹ ساف انگا حکومت ءِ ، ننا مسخت الس ءِ ریلیف تننگ و اوفتے کن آسانی ودی کننگ نا ءِ، الس نا حق آتا نگہبان اُٹ، ہچ کس ءِ الس نا فائدہ غاتیا ڈاکہ خلنگ کن الیپرہ۔ بنجائی وزیر حوالکاری و شینکاری سینیٹر شبلی فراز پارے کہ ننا کارکڑدانا غٹ آن گچین جج پاکستان نا الس ءِ، تحریک انصاف نا حکومت نا فوکس الس نا حقی ویل آتیاٹی ءِ۔ میرٹ نا حکمرانی تحریک انصاف نا حکومت نا طرہ امتیاز ءِ، سیاسی چوریک پاکستان نا سیاست آن پیش تمانو، اپوزیشن نا بیانیہ ترخانے، الس ءِ ترخوک آ مہرہ غاتون ہچ ءُ است خواہی اس اف۔ اوپارے کہ پاکستان تحریک انصاف نا ٹیم وزیراعظم عمران خان نا کماشی ٹی یکجاءُ۔ وزیراعظم عمران خان نا کماشی ٹی پوسکن آ پاکستان مون آ ہِننگ ءِ۔ اوپارے کہ مسکوہی حکمران تا لٹ وپل زرگزران نا بیڑہ ءِ غرق کریر، وخت اس کہ تحریک انصاف نا حکومت زرگزران ءِ مین تیان کشنگ کن پبی گام گیج کرے۔
