شہید آتا خاہوت آتا غم اٹ بریبر نا شریک اُن، بنجائی وزیر ہوابازی غلام سرور خان نا ائیر بلیو سانحہ ٹی زوال کروک آ مسافر آتا قبر آتیا حاضری آن پد میڈیا تون گپ وتران

اسلام آباد۔28 جولائی (اے پی پی) بنجائی وزیر ہوابازی غلام سرور خان پارینے کہ نن ائیر بلیو ساںحہ ٹی شہید مروک آ بندغ آتا خاہوت آتا غم اٹ بریبر نا شریک اُن، 22 مئی آ کراچی ٹی پیش بروک آ واقعہ نا انکوائری ءِ وزیراعظم نا پارت آ چنکو وخت اسے ٹی پورو و پبلک کرین۔ داخیال آتا درشانی ءِ او ایچ الیون اسلام آباد قبرستان اٹ ائیر بلیو سانحہ ٹی زوال کروک آ مسافر آتا قبر آتیا حاضری آن پد میڈیا تون گپ وتران کرسا کرے۔ اوپارے کہ ائیر بلیو سانحہ ٹی زوال کروک آ مسافر آتا قبر آتیا حاضری تسنے۔ غلام سرور خان پارے کہ اینو 28 جولائی ءِ ائیر بلیو واقعہ ٹی شہید مروک آتا دہ می برسی ءِ، دہ می برسی نا وخت آ داڑے قبر آتیا حاضری کن دانگیا بسونٹ۔ اوپارے کہ کنے اینواسکان دادے یات ءِ ہراتم ای بلیو ایریا ٹی ئسٹ، ای اسہ جہاز اسے بھاز شیف اٹ بال کرسا خناٹ ہرامارگلہ نا مش تا کنڈآ ہناکہ او جہاز مارگلہ نا مش تیا ہنسا ڈغار آ تما۔ اوپارے کہ نن دا شہید آ بندغ آتا خاہوت آتا غم اٹ بریبر نا شریک اُن۔ اوپارے کہ ہنداوڑ نا واقعہ اس بیست ءُ دو مئی آ مس، ای انکوائری ءِ اسہ تُواٹ پورو مننگ نا پاریٹ و وزیراعظم عمران خان نا پارت آ دا انکوائری ءِ پورو کرین و پبلک کرین۔ انکوائری نا بابت نن پارین کہ انکوائری آجوبایدے مرے تانکہ خاہوت و مچ آ قوم ءِ اصل راستکی تا معلوم مرے۔ ننا وزارت نا درگہ غاک مدام غٹ اکن ملوک ءُ۔