جون اٹی ملکی برآمد آتا کچ 25 درسد ودکی اتون 1.6 ارب ڈالر اسکان سرمس، ریکارڈ ترسیلات زررسینگا، مئی ٹی ملک اٹی براہ راست پیشن نا زرکاری ٹی 46 درسد ودکی مس، وزارت خزانہ نا اقتصادی اپ ڈیٹ رپورٹ

اسلام آباد۔ 28 جولائی (اے پی پی) مالی سال 2020ء نا آخریکو تُو اٹی ملک انا اقتصادی ٹک آتیٹی گچینی ریکارڈ کننگانے، جولائی نا تُو اٹی ملکی برآمد آتیٹی ودکی بننگ و برآمد آتا ماہانہ کچ 2 آن ہلیس2.1 ارب ڈالر اسکان مننگ نا گمان ءِ، مشکل جہانی حالیت آتیان پد ہم پیشن نا بشخ سوگو ءِ، کوروناوائرس نا جہانی دین آن پد ہم حسابات جاریہ نا نسخان پدریسہ کم سلک۔ درآمدات و برآمدات آتیٹی کوروناوائرس نا دین آن پد ہم مالی سال 2019-20ء ٹی حسابات جاریہ نا نسخان اٹی 77.9 درسد کمتی مس۔ وزارت خزانہ نا کنڈآن جاری اقتصادی اپ ڈیٹ نا رداٹ جون اٹی ملکی برآمد آتیٹی مئی انا مقابلہ ٹی 25 درسد ودکی ریکارڈ کننگا۔ جون 2020ء ٹی ملکی برآمد آتا کچ 1.6 ارب ڈالر ریکارڈ کننگا۔ مئی ٹی ملکی برآمد آتا کچ 1.3 ارب ڈالر مسوسس۔ جون 2020ء ٹی ریکارڈ ترسیلات زر رسینگا۔ جون اٹی ترسیلات زر اٹ تدوک آ سال انا ہندا مدانا مقابلہ ٹی 51 درسد و مئی 2020ء نا مقابلہ ٹی 32 درسد ودکی مون آ بس۔ ملک اٹی براہ راست پیشن نا زرکاری ٹی مئی 2020ء نا مقابلہ ٹی 46 درسد ودکی مس۔ تدوک آ مالی سال انا آخیریکو تُو اٹی حکومت نا کنڈآن مقرر کروک وڑوڈول انا رداٹ کیہی کاروبار بناکرے ہراڑآن اقتصادی سرجزآتیٹی ودکی مس۔ ریستوران و تعلیمی ادارہ غاتیٹی سرجزآتا بناءِ کننگ زوت گمانی ءِ۔ پاکستان اسٹاک ایکسچینج اٹ ہم گچینی بننگ ءِ۔ زرکارآتیکن حکومت نا آسودہی پیکج اٹ کے ایس ای 100 انڈکس اٹ 25 مارچ آن پد آن ہلیسس 20 جولائی اسکان 10422 پوائنٹ یا 38.5 درسد ودکی مس۔ ہنداوڑ مارکیٹ کیپٹلائزیشن نا مد اٹ 1737 ارب روپئی موصول مس و داٹی ودکی نا کچ 32.3درسد ئس۔ اپ ڈیٹ انا رداٹ مالی سال 2020ء ٹی ایف بی آر نا خراج کٹیا تیٹی 4 درسد ودکی مس، عبوری حساب وکتاب نا رداٹ تدوک آ مالی سال اٹی ایف بی آر نا خراج کٹیا تا کچ 3.98 ٹریلین روپئی مس، مالی سال 2019ء ٹی ایف بی آر نا خراج کٹیا تا کچ 3.83 ٹریلین روپئی مسوسس۔ مئی انامقابلہ ٹی جون اٹی ایف بی آر نا خراج کٹیا تیٹی 100درسد ودکی مس۔ جون 2020ء ٹی ایف بی آر کٹیا تا مد اٹ 448.7 ارب روپئی یکجا کرے، مئی 2020 ء ٹی ایف بی آر نا خراج کٹیا تا کچ 223.9ارب روپئی ئس۔ جولائی 2020ء نا اولیکو ہفتہ ٹی 2.29 درسد ودکی مس، اونا بروک آ ہفتہ ٹی داٹی 0.98 درسد نا کمتی و اوکان پد 0.01 درسد کمتی مس۔ حکومت نا کنڈآن مقرر کروک حرکیات اٹ جولائی ٹی نہاد آتا حساس ٹک 7.6و 9.3 درسد نا نیام اٹ مننگ نا گمان ءِ۔ اپ ڈیٹ انا رداٹ دین انا سوب آن اپریل و مئی ٹی برآمد آتیٹی کمتی مس ولے اوکان پد داٹی پدریسہ ودکی مس، مالی سال 2020-21ء کن برآمد آتا کچ 22.7 ارب ڈالر مقرر کننگانے ہرا فی تُو 1.9 ارب ڈالر مریرہ۔