پولیو مہم اٹ پنچ سال آن کم وئی نا 94 درسد چناتے پُڑی کنفنگا، کوآرڈینیٹر انسداد پولیو پروگرام

اسلام آباد۔ 28 جولائی (اے پی پی) انسداد پولیو پروگرام نا کوآرڈینیٹر ڈاکٹر رانا صفدر پارینے کہ پاکستان پولیو پروگرام پولیو مہم اٹ درکار ہدف ءِ دوئی کرینے، پنچ سال آن کم وئی نا 94 درسد چناتے پُڑی کنفنگانے، پولیو مہم اٹ پولیو ورکرآک کورونا آگہی ہم فراوان کریر۔ سے شنبے نادے آ جاری بیان اٹ اوپارے کہ پاکستان پولیو پروگرام پولیو مہم اٹ درکار ہدف ءِ دوئی کرینے۔ پنچ سال آن کم وئی 94 درسد چناتے پُڑی کنفنگانے۔ کوروناوائرس نا دین انا سوب آن پولیو مہم اٹ چار تُو انا تعطل بس۔ اوپارے کہ پولیو مہم کراچی، فیصل آباد، اٹک، سویلی وزیرستان و کوئٹہ ٹی چلیفنگا۔ پولیو ورکرز مہم آن مست کوروناوائرس آن بچفنگ نا تربیت تننگا۔ اوپارے کہ مہم اٹی راجہ فاصلہ غاتا خیال ءِ تخنگا۔ پولیو مہم اٹ پولیو ورکر آک کورونا وائرس نا دین انا بارواٹ آگہی ہم فراوان کریر۔ ڈاکٹر رانا صفدر پارے کہ پولیو مہم پرامن وڑاٹ پورو مس۔ اوپارے کہ سیکورٹی ادارہ غاک مہم نا پرامن اڈتننگ اٹ پبی کڑد ادا کرے۔ سرسہب مہم آ غٹ بندغ و لمہ و باوہ غاتا منت واری ءِ ہرفے۔ اوپارے کہ آخبت ہم ہدف آتا دوئی کننگ اٹ کمکاری نا اومیت ءِ۔ اگست و ستمبر اٹ بھلو کچ اسے آ مہم آتا تیاری مننگ ءِ۔ اوپارے کہ وائرس نا چٹفنگ کن اکتوبر، نومبر و دسمبر اٹ قومی مہم آک مریرہ۔