اسلام آباد۔ 28 جولائی (اے پی پی) بنجائی وزیر اقتصادی امور مخدوم خسروبختیار پارینے کہ پاکستان کوروناوائرس نا دین انا سرسہبی اٹ مقابلہ ءِ کرینے، ملک اٹ جان جوڑی نا ساڑی آ نظام ءِ سوگو کننگ کن غٹ گمانی گام گیج کننگ انگ ءِ۔ اوداہیت ءِ کوروناوائرس نا دین انا برخلاف اسیجائی گام گیج آتا رداٹ چین، اوغانستان، پاکستان و نیپال نا وزیر خارجہ غاتا ویڈیو کانفرنس اٹ وزیر خارجہ شاہ محمود قریشی نا نمائندگی ءِ کرسا پارے۔ مذاکرات نا میزبانی ءِ چین نا اسٹیٹ قونصلر و وزیر خارجہ وانگ ی کرے۔ اوپارے کہ پاکستان کوویڈ۔ 19 تون مون تننگ کن کمکاری ءِ مون آ دننگ و دین آن پد زرگزران نابحالی کن بشخ ہلوک آ ملک آتون کاریم کاریم کننگ کن تیار ءِ۔مخدوم خسروبختیار پارے کہ ننا چکار زند و روزگار ءِ بچفنگ آٹے، دین نئے بیرہ انسانی و اقتصادی نسخان کرینے بلکن دادنیا نا راجی و سیاسی پنجر ءِ زہمی کرینے۔ پاکستان نا الس نا مشکل و مصیبت آتیٹی کمتی کن وزیراعظم عمران خان 595ملین ڈالر مالیت نا پی پی آر پی و 8 ارب ڈالر نا کمکی پیکج نا پڑو ءِ کرینے۔ راج انا نیزگار و نزور تپہ غاتے کن نغد امداد نا احساس پروگرام نا بناءِ کننگانے۔ وزیراعظم عمران خان نیزگار و پدسلوک ملک آتیکن وام تیٹی ریلیف نا گام ءِ ہرفے۔ اوپارے کہ پاکستان نا سمارٹ لاک ڈاؤن نا پالیسی نا ذکر انا قابل بھرم اس پیش تمانے۔ دا پالیسی آن کوروناوائرس آن زہمی مروک آ بندغ آتا کچ اٹ نمان کمتی بسنے۔ اوکوروناوائرس نا دین اتون مون تننگ کن ہر چار آ ملک آتا نیام اٹ تعلقداری و کمکاری ءِ مون آ دننگ نا گرج آ زور شاغا و پارے کہ اقتصادی بحالی کن عملی گام گیج کننگ وخت انا گرج ءِ۔ اوپاک چین اقتصادی راہداری ءِ بیلٹ اینڈ روڈ انیششیٹیو نا فلیگ شپ پروجیکٹ گوندسا پارے کہ کوویڈ۔ 19 آن پد سی پیک علاقائی ودکی و بحالی ٹی کمکار مریک۔ کوروناوائرس نا رداٹ کانفرنس اٹ اوار ملک آتا چکار ءِ مقبوضہ کشمیرنا حالیت آتا کنڈآ کرفسا اقتصادی امور نا وزیر مقبوضہ کشمیر نا فوجی گٹ کننگ نا چٹفنگ، جان جوڑی نا جہانی چاہندار آتے مقبوضہ کشمیر اسکان رسینگ تننگ و گٹ کشمیری تے دمدستی وڑاٹ درکار طبی آسراتی تننگ نا خواست کرے۔
