اسلام آباد۔ 28 جولائی (اے پی پی) قومی وزارت جان جوڑی سروسز، یونیسیف و جہانی ادارہ جان جوڑی اسہ اہم ءُ آن لائن دیوان اسے ٹی مخلوق آ زور شاغانے کہ او بھلا عئید ءِ کننگ نا وخت آ کورونا وائرس نا تالانی ءِ توننگ کن سلاہ کروک رویہ غاتیا سختی اٹ عمل کیر تانکہ بروک آ عئید ءِ رکھ وڑاٹ اڈتننگ مرے۔ دیوان نا کماشی ءِ وزیراعظم پاکستان نا خصوصی کمکار جان جوڑی ڈاکٹر ظفر مرزا کرے۔ دا آن لائن دیوان اٹی داہیت آ زور شاغنگاکہ دا پاکستان نا ہر بندغ نا فرض ءِ کہ او تینے و تینا دوست آتے کوروناوائرس آن بچفنگ کن تینا کڑد ءِ ادا کیر۔ بھلا عئید انا دے تیٹی کوروناوائرس آن بچنگ نا سوب مروک آ رویہ غاتے تینا کننگ نا مسخت وزیراعظم عمران خان نا کنڈآن پیش کروک آ آب اٹنگا عملی گام گیج(ایس او پیز) تیا عملدرآمد کرسا وائرس نا تالانی ءِ اسہ وار ولدا ترندی اسکان سرمننگ آن توروئی ءِ ہراوڑاو چنکا عئید آن پد سرمسوسس۔ داوخت آ ہیت کرسا ڈاکٹر ظفرمرزا پارے کہ نن داوخت آ دَینی حالیت آتون جنگ انا اسہ اہم ءُ مرحلہ سے آٹی اُن۔ داوخت آ کیس آتا کچ اٹ بھلو حداسسکان کمتی مسنے و دا مرحلہ غا نن ہمو لاپرواہی و ڈیوالائی تے کپنہ ہرافتا آزموندہ ننے چنکا عئید انا دے تیٹی مسوسس۔ نئے بیرہ کوویڈ۔ 19 نا دین آن ودی مروک آ حالیت آک مچ آ ملک اٹی مخلوق نا زند و جان جوڑی ءِ بھاز بے وڑ زہمی کرینو بلکن دانا سوب آن اہم خذمت آتا فراوانی نا چرجوئی آ ہم خراب ءُ زہم آ تمانے۔ داخذمت آتیٹی جان جوڑی، غذا، تعلیم، دیر و جان جوڑی و سفائی کون آ بنداوی خذمت آک اوار ءُ۔ داوخت آ ہیت کرسا پاکستان اٹ یونیسیف نا نمائندہ مس عائدہ گرماپارے کہ نن دا وخت آ کوروناوائرس نا برخلاف جنگ انا ہم انگا مرحلہ ٹی پترینگانن۔ داجنگ اٹ مارچ انا تُو آن ننا کماشی ءِ وزیراعظم پاکستان نا خصوصی کمکار جان جوڑی ڈاکٹر ظفرمرزا و اونا اہم شریدار آک کننگ ءُ۔ داکان بیدس خذمت کن وقف ہیلتھ ورکرآتا ہراول دستہ ہم کلیدی کڑد ادا کننگ اٹ لگوک ءُ، اومستی پارے کہ داوخت آ ہراتم ننے آن ہر اسٹ تینا دوست آتون بھلاعئید ءِ کننگ نا تیاری تیٹی اختہ ءُ ننے آ ہمورویہ ءِ تینا کننگ المی مریک ہرافتا کمک اٹ نن تینا خاہوت و قریب و سیال آتا مخلوق نا زند ءِ کوروناوائرس نا تالانی ءِ تورسا رکھ کننگ کینہ۔ نن دا رویہ غاتیا اخہ در سختی اٹ عمل کینہ ہموخہ زوت نن زند ءِ تیر کننگ نا قابل مرسا تینا چنا و خاہوت ءِ ہموغٹ المی خذمت آتے فراوان کننگ کینہ ہرافتا اوفتے بھاز گرج ءِ۔ داخذمت آتیٹی قابل انسداد ناجوڑی تیان بچنگ کن ویکسین تننگ، غذائی خذمت آتا کمک اٹ رُدنگ نا کمتی نا گواچی مروک آ چناتے بچفنگ و چناو پوسکن بالغ مروک آتے تعلیم نا کمک اٹ تینا آخبت ءِ جوڑ کننگ نا قابل کرسا مخلوق نا زند انا آب ءِ گچین کننگ اوار ءِ۔ حکومت پاکستان یونیسیف و جہانی ادارہ جان جوڑی نا کمک اٹ مچ آ ملک اٹ دا المی خذمت آتا فراوانی نا بنا و اوفتا تسلسل ءِ برقرار تخنگ نا عمل ءِ پک کننگ نا چرجوئی ٹی لگوک ءِ۔ پولیو نا زیات گڑتی تتون مون تروک ضلع غاتیٹی پولیو نا چٹفنگ کن ویکسین کُنفنگ نا چرجوئی نا بنامہالو آن مسنے۔ پاکستان اٹ جہانی ادارہ جان جوڑی نا نمائندہ ڈاکٹر پالیثاگورنارتھناماہیپالاداوخت آ پارے کہ جہانی ادارہ جان جوڑی پاکستان نا کوشست آتا ستاءِ کینہ۔ کوویڈ۔ 19 نا رداٹ حکومت پاکستان تینا شریدار خاص وڑاٹ جہانی ادارہ جان جوڑی و یونیسیف تون اواری اٹ مچ آ ملک اٹ جان جوڑی نا المی خذمت آتا فراوانی نا بناءِ کرینے۔ پاکستان نا کیہی ضلع غاتیٹی پولیو آن بچنگ نا ویکسین کُنفنگ نا چرجوئی اسہ وار ولدا سرسہبی اٹ بناکرینے۔ جہانی ادارہ جان جوڑی وزیراعظم پاکستان و ڈاکٹر ظفرمرزا نا کماشی ءِ کوویڈ۔ 19 نا دین انا دے تیٹی کوروناوائرس اٹ جنگ انا عمل نا ستاءِ کیک۔ اسلامی نظریاتی کونسل نا چیئرمین ڈاکٹر قبلہ ایاز، جہانی کرکٹ نا گوازی گر محمد رضوان، پمز اسلام آباد اٹ کوویڈ۔ 19 نا فوکل پرسن ڈاکٹر نسیم و 15 سال انا عریشہ فاطمہ ئسک دا وخت آ ویڈیو کلہو ریکارڈ کریر۔ داٹی دا کلہو آتے چلیفنگا ہرافتے ٹی مخلوق آن خواست کننگانے کہ او وائرس نا برخلاف متحرک مرسا مخلق نا زند ءِ بچفنگ اٹ تینا کڑد ءِ ادا کیر۔ تینے کوروناوائرس آن بچفنگ کن مخلوق ءِ مرے کہ او السی مچی تیان مُر مریر۔ ہلنگ و حتی کہ مسیت کن اُراغان پیش تمنگ نا وخت ماسک بینر پیش تمر، تینا دوتے باقاعدگی اٹ صابون و ساف دیر اٹ 20 سکینڈ اسکان سلر یا تو دوتے جراثیم آن پاک کروک آ محلول آتے کاریم اٹ اتیر۔
