اسلام آباد۔ 27 جولائی (اے پی پی) جہانی بینک پاکستان اٹ ہاؤسنگ نا بشخ ءِ مون آ دننگ اٹ کمک فراوان کننگ ءِ۔ داہیت ءِ پاکستان اٹ جہانی بینک انا کنٹری ڈائریکٹر الانگوپیچوموتو دوشنبے نادے آ راجی رابطہ نا ویب سائٹ ٹویٹر آ جاری کلہو و منسلکہ بیان اٹ پارینے۔ اوپارے کہ جہانی بینک پڑک نا ادارہ انٹرنیشنل فنانس کارپوریشن پاکستان اٹ پاکستان مارگیج ری فنانس اسکیم لمیٹڈ اٹ 500 ملین ڈالر نا ایکویٹی زرکاری کیک۔ دا زرکاری نا مسخت پاکستان اٹ ہند آتا تفنگ کن معقول و آسان وام تا فراوانی نا عمل ءِ ترند کننگ نا ءِ۔ پاکستان اٹ 2030ء و 2040ء نا نیام اٹ شار و خلق آتا آبادی اِراہنداخہ مننگ ناکساس ءِ و آبادی کن جوان ہند آتا فراوانی اسہ اہم ءُ چیلنج اسے، داوخت آ پاکستان اٹ اسہ کروڑ ہند آتا کمتی ءِ ہراٹی سالانہ 7 لکھ یونٹ نا ودکی مننگ ءِ، داڑآن چپ پاکستان اٹ ہندآتیکن وام دوئی کننگ نا کچ 0.3 درسد ءِ ہرا سویلی ایشیاء نا ایلو ملک آتامقابلہ ٹی بھاز کم ءِ۔ سویلی ایشیاء ٹی اُراتیکن وام تا اوسط کچ 3.4 درسد ءِ۔ اوپارے کہ انٹرنیشنل فنانس کارپوریشن نا کمک و کمکاری اٹ خیبر پختونخوا، مسکوہی فاٹا و بلوچستان اٹ ہاؤسنگ کن مریس میعاد وام تا فراوانی ٹی کمک رسینگک۔
