پاکستان اسٹاک ایکسچینج نا کارکڑداٹ پدریسہ پنچ ہفتہ غان ودکی

اسلام آباد۔ 27 جولائی (اے پی پی) پاکستان اسٹاک ایکسچینج (پی ایس ایکس) نا کارکڑد اٹ پدریسہ پنچ ہفتہ غان ودکی مسنے۔ تدوک آ ہفتہ نا ایسر آ پی ایس ایکس انڈکس 276پوائنٹ ودکی اتون 37 ہزار 608 پوائنٹ آتیا بند مسنے۔ دیامر بھاشا ڈیم و پوسکن آ پاکستان ہاؤسنگ پروگرام نا سوب زرکارآک سیمٹ تیار کروک آ صنعت آتا حصص نا ہلنگ اٹ است خواہی نا درشانی ءِ کننگ ءُ۔ ایلو کنڈآ اسٹیٹ بینک آف پاکستان نا رپورٹ نا رداٹ تدوک آ مالی سال 2019-20ء ٹی پاکستان اٹ کروک آ براہ راست درملکی زرکاری (ایف ڈی آئی) 88 درسد ودکی اٹ 2.56 ارب ڈالر اسکان ودانے وخت اس کہ مالی سال 2018-19ء ٹی پاکستان اٹ 1.36ارب ڈالر نا ایف ڈی آئی کننگاسس۔ براہ راست درملکی زرکاری ٹی ودکی وخت اس کہ ملک اٹ کوروناوائرس نا پوسکن آ کیس و مرک آتیٹی کمتی نا حوال آتیان ہم زرکارآتاپت اٹ ودکی مسنے ہرانا سوب آن پی ایس ایکس اٹ مثبت رجحان مسنے۔ پی ایس ایکس نا رپورٹ نا رداٹ تدوک آ ہفتہ ٹی کمرشل بینک آتا حصص نا بہاکننگ اٹ 253 پوائنٹ وخت اس کہ پاور جنریشن و ڈسٹری بیوشن اٹ 76، آٹوموبائل اسمبلرز31، ٹیکسٹائل 28 و ٹیکنالوجی و ٹیلی کمیونیکیشن نا حصص نا بہاکننگ اٹ 17پوائنٹ ودکی ریکارڈ کننگانے۔