اسلام آباد۔ 24 جولائی (اے پی پی) بنجائی وزیر کانود فروغ نسیم پارینے کہ کلبھوشن یادیو نا بارواٹ جہانی عدالت انصاف نا فیصلہ غا عمل کپک تو پاکستان آ پابندی خلنگ مریک، جہانی عدالت انصاف نا فیصلہ ءِ مون آ تخسا آرڈیننس جوڑ کننگانے، دا حساس ءُ معاملہ اسے داڑآ سیاست کننگپ۔ جمعہ نادے آ قومی اسمبلی ٹی گپ وتران کرسا اوپارے کہ آرڈیننس نا بابت ایوان اٹ ہیت مس، دا آرڈیننس نا بابت درست راستکی تے اپوزیشن نا مون آ تخنگ خواوہ۔ دانا گڑاس تاریخ بھاز اہم ءُ۔ 3مارچ 2016ء آ کلبھوشن یادیو ءِ دزگیر کننگک، ہمووخت آ بنجائی حکومت فیصلہ کریسس کہ دادے قونصلر رسینگ تروئی اف۔ 8 مئی 2017ء آبھارت آئی سی جے ٹی کیس ءِ فائل کرے، پاکستان آئی سی جے آن پیش بننگ کتوکہ، آئی سی جے فیصلہ ایتک کہ قونصلر رسینگ تننگے، آئی سی جے نا فیصلہ نا رداٹ آرڈیننس جوڑ کننگا، این آراو ہمومریک ہراپرویز مشرف سزا تے معاف کرے۔ داآرڈیننس اٹ ہچ ءُ سزاسے بشخنگ تنے۔ ننے جہانی عدالت انصاف نا فیصلہ غاتے امنا کروئی ءِ، اگہ دُن کپن تو بھارت ننا برخلاف ہنسا پابندی خلیفنگ کیک۔ اوپارے کہ اپوزیشن جماعت آک ننے آن دا اعتراض کریر کہ آرڈیننس جوڑ کننگ آن مست ننے انت اکن پاتوس، داہچ ءُ جاگہ اس لکھوک اف کہ آرڈیننس اتنگ آن مست اپوزیشن آن ہریفر۔ داآرڈیننس ءِ بالشت نا کیرغ آن تخسا ہچ گہس جوڑ کتنے۔ سزاءِ آئی سی جے چٹفے تو داحکومت ہم کتنے، اگہ سزا ءِ چٹفنگاکہ تو ای نمتون سلوک برانز کریٹہ۔ اوپارے کہ بھارت تیاری کروئے کہ اگہ پاکستان آئی سی جے نا فیصلہ ءِ منپک تو او آئی سی جے تون رابطہ کیک۔ وزیر کانود پارے کہ ہچ گہس آ دوبہ خلنگ خواپنہ،ہراتم اودے دزگیر کننگاتو ہمووخت انابنجائی حکومت فیصلہ کرے کہ اودے قونصلر رسینگ تننگپ۔ فروغ نسیم پارے کہ ہمووخت انا حکومت جاسوسی نا سوب آن اودے قونصلر رسینگ تفننگ نا فیصلہ کرے۔ اگہ ہمووخت آ پاکستان اسہ ریزرویشن اس تسکہ آپشنل پروٹوکول آن پیش تماکہ و آئی سی جے نا دنگ آن معاملہ ءِ پیش کریکہ، ولے داوڑ متو، فیصلہ ہمووخت انا بنجائی حکومت نائس۔ وزیر کانود فروغ نسیم پارے کہ دا آرڈیننس کلبھوشن یادیو نا سزاءِ چٹفتنے۔ آرڈیننس داخاطرآن ایسون کہ دنیا ءِ معلوم مرے کہ پاکستان زموار ءُ ملک اسے۔ اوپارے کہ ای اپوزیشن ءِ وخت اس ہم پاتنوٹ نم مودی نایار اُورے۔ کنا فرض ءِ کہ نمے راستکی تے پاو۔ نم بے شک سیاست کبو۔ حساس سیکورٹی باندات ءِ داڑآ سیاست کننگپ۔ اوپارے ک اٹارنی جنرل دفتر آرڈیننس نا بابت جہانی وکیل آتیان ہم سلاہ ہلک۔ جہانی وکیل آتا سلاہ ءِ مون آ تخسا اسلام آباد ہائیکورٹ آ ہنا۔ حکومت نا دا موقف اف کہ فوجی عدالت نا فیصلہ ءِ چٹفنگے۔ اوپارے کہ ای اپوزیشن نا سوج آتا ورندی ءِ تننگ نا چاری اُٹ۔ اوپارے کہ ننے آئی سی جے پارے کہ نم کلبھوشن ءِ اپیل دائر کننگ ناحق ایتبو، بھارت یاکلبھوشن اپیل دائر کننگ کیرہ۔
