اسلام آباد۔ 24جولائی (اے پی پی) وزیراعظم نا سلاہکار واپار عبدالرزاق داؤد پارینے کہ حکومت صنعت کار و پوریاگر آتے گچین ترغیب و کٹیا کروک پیکج اس ترسا برآمدآتیٹی ودکی و درآمد آتیٹی کمتی نا کمک اٹ ملکی زرگزرانی نا حکمت عملی آ عمل کننگ ءِ۔ اوداہیت ءِ جمعہ نادے آ صدر سارک چیمبر آف کامرس اینڈ انڈسٹری افتخار ملک نا کماشی ٹی یونائیٹڈ بزنس پڑک نا بڑزکو کہول انا ڈل اتون گپ وتران کرسا پارے۔ ڈل اٹ ایس ایم منیر، خالد تواب، زبیر طفیل، سہیل الطاف، ظفر بختاوری، ملک سہیل حسین، وقار احمد میاں و رحمت اللہ جاوید ئسک اوار ئسر۔ وخت اس کہ بنجائی سیکرٹری واپار ہم داوخت آساڑی ئس۔ عبدالرزاق داؤد پارے کہ حکومت زرگزران نا سوگوی و صنعت کاری نا مون آ دننگ کن گونڈ ءُ وخت و مریس مدتی پالیسی تیا کاریم کننگ ءِ۔ وزیراعظم عمران خان نجی بشخ ءِ بھاز اہمیت ایتک و او کاروباری برادری ءِ مون تروک ویل آتا دمدستی ایسری کن پارت جاری کرینے۔ سلاہکار واپار پارے کہ حکومت نا کاروباردوست پالیسی تا سوب آن جہانی بینک انا کاروباری آسانی تا انڈیکس اٹ پاکستان نا پوزیشن 28 پوائنٹ گچین مسنے ہرا پیشن نا ملک آن زرکار آتیکن بے کچ است بڈ ءُ ٹک اسے۔ اوپارے کہ ملک ءِ جاپان، ویتنام و سویلی کوریا تون اوار اوار سویل دے ٹکی ایشیائی و پیسفک مارکیٹ آتون ہم مربوط کننگک و حکومت واپارنا مون آ دننگ کن دا ملک آتون ہیت وگپ کیک۔ عبدالرزاق داؤد ڈل ءِ باوری کرفے کہ اوفتا غٹ قابل عمل سلاہ و روا خواست آتے پالیسی نا عمل اٹ اہمیت تننگک و اوفتا غاو تا ازالہ کن تعلقدارحلقہ غاتے دمدستی المی پارت جاری کننگک۔ اسلام آباد اٹ سارک چیمبر نا ہیڈ آفس نا10 مزلہ ماڑی نا پوروی نا بابت سلاہکار واپار پارے کہ دا چرجوئی ٹی المی فنڈ زوت جتا کننگک۔ یوبی جی نا سرپرست اعلیٰ و ٹی ڈیپ انا مسکوہی چیف ایگزیکٹو ایس ایم منیر ڈل انا سلاہ تیٹی است خواہی و خواست آتیا سجفنگ آ سلاہکار واپار نامنت واری ءِ ہرفیر و دااوڑدہی ءِ بھرمی گوندسا پاریر کہ داڑآن کاروباری برادری خاص کر برآمد کنندگان و درملکی و ہندی زرکار آتا پت ءِ بحال کننگ اٹ بھاز کمک رسینگک۔ زبیر طفیل سلاہکار واپار ءِ باوری کرفے کہ پوریاگر برادری اصلاحاتی ایجنڈا غا عمل درآمد و کورونا غان پد مون تروک زرگزرانی چیلنج آتا مون ءِ توننگ کن حکومت ءِ پبی کمک فراوان کیک۔
