جماعت اسلامی آزاد جموں و کشمیر نا 5 اگست ءِ تہاری دے انا وڑاٹ اڈتننگ نا پڑو

اسلام آباد۔ 23 جولائی (اے پی پی) جماعت اسلامی آزاد جموں و کشمیر نا امیر ڈاکٹر خالد محمود خان پڑو کرینے کہ جماعت نا پلیٹ فارم آن 5 اگست ءِ مچ آ دنیا ٹی رہینگوک کشمیری تا کنڈآن تہاری دے انا وڑاٹ اڈتننگک، ہندوستان اقوام متحدہ نا چارٹر، سلامتی کونسل نا قرارداد و غٹ انسانی حق آتا سنگین خلاف ورزی کرسا 5 اگست 2019ء آ مقبوضہ کشمیر ءِ انڈین یونین اٹ اوار کرسا کشمیری تیان اوفتا زند انا حق ءِ پُلا۔ داڑے جاری بیان اٹی اوپارے کہ 5 اگست آن مقبوضہ کشمیر اٹی بدترین لاک ڈاؤن و ظالمانہ کرفیو خلوک ءِ مظلوم کشمیری تا اُراک جیل تا منظر ءِ پیش کننگ ءُ کشمیریک تینا کزیت کروک آ عزیز آتے اُراتیٹی جہہ جاگہ کننگ آ بیوس ءُ ، چنا، بزرگ، ورناو و زالبول آتیا ظلم کاٹم آن گدرینگ انگءِ گرج دا ہیت انا ئس کہ جہانی برادری ہندوستان نا دا جنگی ڈوہ انا برخلاف سلامتی کونسل اٹ قرارداد پاس کرسا فوجی نیام تموسس بدبختی اٹ جہانی برادری مجرمانہ وڑاٹ چُپ ءِ۔ اوپارے کہ ہندوستان ہروڑنا چم آتے کاریم اٹ ایسونے مسلم گیشتری ءِ اقلیت اٹ بدل کننگ کن ہندوتے آباد کننگ کن جعلی ڈومیسائل جاری کننگ انگ ءِ، 5 اگست آن داتم اسکان سد آ کشمیری تے شہید ہزار آتے دزگیر کننگانے بیدادی نا چرجوئی برجاءِ۔ اوپارے کہ کوروناوائرس آن پد ہم کشمیری تے ہچ ءُ ریلیف اس تننگتنے۔ دا غٹ حالیت آتیان پد ہم مجاہد صفت کشمیری تا استقامت ءِ سلام پیش کینہ کہ او تینا جہد ءِ برجاتخانو، اوپارے کہ جماعت اسلامی 5 اگست آ ہندوستانی گام گیج آتا برخلاف ریلی، جلسہ جلوس و سیمینار کیک اقوام متحدہ نا مبصرآتے یات داشت پیش کننگک انسانی حق آتا ادارہ غاتے چکار ءِ داکنڈآ کننگک کہ او کشمیرنا دورہ ءِ کیر۔ داوخت آ اواو آئی سی آن ہم خواست کرے کہ او کشمیری تے آجوئی ترفنگ کن تینا کڑد ءِ ادا کے۔