اسلام آباد۔ 23 جولائی (اے پی پی) بنجائی وزیر امور کشمیر و گلگت بلتستان علی امین خان گنڈاپور تون نگران وزیراعلیٰ گلگت بلتستان میر افضل نا اسلام آباد اٹی اوڑدہی مس۔ اوڑدہی ٹی گلگت بلتستان نا جم حالیت آتیا گپ وتران کننگا۔ داوخت آ وزیر امور کشمیر علی امین گنڈاپور پارے کہ بنجائی حکومت گلگت بلتستان نا شونداری و شونہالی ٹی بھاز است خواہی تخک۔ مشکل زرگزرانی حالیت آتیان پد ہم گلگت بلتستان ءِ بھلو شونداری فنڈ اس تس، سیل و سوات نا شونداری و سی پیک نا سوب آن گلگت بلتستان پاکستان نا زرگزرانی حب مریک، دیامیر بھاشا ڈیم انا تفنگ نابناساڑی حکومت نا بھلو سرسہبی اسے۔ علی امین گنڈاپور پارے کہ ڈٹ انا پوروی آن گلگت بلتستان ءِ ارب آ روپئی نا رائلٹی ملک، حکومت ہائیڈل ڈٹ آتا تفنگ آ پبی چکار کننگ ءِ۔ گلگت بلتستان اٹ روڈ آتا تفنگ حکومت نا اولیت آتیٹی اوار ءِ۔ علی امین گنڈاپور پارے کہ گلگت بلتستان نا تعلیم و جان جوڑی نا بشخ انا شونداری کن حکومت سجفوک ڈٹ بندی کرینے۔ گلگت بلتستان اٹی ٹیلی کام نا آسراتی تے گچین کننگ نا ڈٹ بندی برجاءِ۔ وزیراعلیٰ پارے کہ گلگت بلتستان نا بابت بنجائی حکومت نا کمک ستاکڑزک۔ پرامن ماحول اٹ ساف و شفاف گچین کاری اڈتننگ حکومت نا اولیتءِ۔ گلگت بلتستان اٹ جان جوڑی نا بشخ اٹ گچینی کن نرسنگ اسکول آتا جوڑ کننگ المی ءِ۔ میر افضل پارے کہ کورونا وائرس نا رداٹ سیل و سوات نا بشخ اتون وابستہ مخلوق مشکل آتا گواچی ءِ۔ معدنیات نا بشخ آن فائدہ ہرفنگ کن ڈیہہ نا جیولوجیکل سروے کرفنگے۔
