پنجاب اٹی اسہ پبی ءُ و گچین صوبائی مالیاتی کمیشن نا نظام اس جوڑ کننگک، بنجائی وزیر ڈٹ بندی اسد عمر

اسلام آباد۔ 23 جولائی (اے پی پی) بنجائی وزیر ڈٹ بندی، شونداری و خصوصی گام گیج اسد عمر پارینے کہ پنجاب اٹ اسہ پبی ءُ و گچین صوبائی مالیاتی کمیشن نا نظام اس جوڑ کننگک۔ پنچ شنبے نادے آ اسلام آباد اٹی صوبائی مالیاتی کمیشن نا باندات آ گپ وتران کننگ کن اسہ دیوان اس مس۔ دیوان اٹی پنجاب نا وزیر خزانہ مخدوم ہاشم جوان بخت، کے پی کے وزیرخزانہ تیمور سلیم جھگڑا، سیکرٹری ڈٹ بندی، صوبائی سیکرٹری خزانہ و سینئر عہدیدار آک ساڑی ئسر۔ دیوان اٹی وزیراعظم نا پارت آتے مون آ تخسا صوبہ غاتیٹی صوبائی مالیاتی کمیشن نا جوڑ کننگ نا چرجوئی ٹی پنجاب اٹ صوبائی مالیاتی کمیشن نا جوڑ کننگ نا باندات آ سجفنگا و گپ وتران کننگا۔ بنجائی وزیر اسد عمر نا پاننگ ئس کہ خیبر پختونخوا ٹی تحریک انصاف نا تدوک آ دور حکومت اٹ جوڑ کروک آ صوبائی مالیاتی کمیشن بھاز گچین وڑاٹ کارکڑد نشان تننگ ءِ ، کے پی نا دانظام نا بابت ہرا آزموندہ مسنے اونا بنداو آ سلاہ تننگک۔ تانکہ پنجاب اٹ اسہ پبی ءُ و گچین صوبائی مالیاتی کمیشن نا نظام اس ٹہیفنگ مرے و دانا ٹائم لائن و عملدرآمد نا فریم ورک آ ہم کاریم کننگک۔ دیوان اٹی داہم پک کننگاکہ اسہ تُو انا تہہ ٹی ہڑتوم آ صوبہ غاتا تین پہ تینی سلابت آن پد اسہ پین دیوان اس مریک ہراٹی غٹ سلاہ تے مون آ تخسا حتمی لائحہ عمل اس تیار کننگک۔