بھارت جہانی کانود نا خلاف ورزی ءِ کرسا لین آف کنٹرول آ شاری آبادی تے شست کننگ ءِ، وزیر خارجہ مخدوم شاہ محمود قریشی

اسلام آباد۔ 23 جولائی (اے پی پی) وزیر خارجہ مخدوم شاہ محمود قریشی پارینے کہ نن درملکی میڈیا نمائندہ غاتے لین آف کنٹرول نا دورہ ءِ کرفنگ کن ہنان، انت بھارت آجو صحافی تے مقبوضہ کشمیر آ دیک، اقوام متحدہ جنرل اسمبلی نا صدر دوشنبے نادے آ پاکستان آ بننگ ءِ و ای اونا مون آ پاکستان نا موقف ءِ بیان کیوہ، بھارت جہانی کانود نا خلاف ورزی ءِ کرسا لین آف کنٹرول آ شاری آبادی تے شست کننگ ءِ۔ پنچ شنبے نادے آ لین آف کنٹرول آ جہانی میڈیا نا دورہ نا بابت اسہ بیان اسے ٹی وزیر خارجہ پارے کہ درملکی میڈیا نمائندہ غاتا لین آف کنٹرول نا دورہ بھاز اہم ئس، ہندوستان نا کنڈآن مدام دوہرامعیار مون آ بس، پاکستان بٹنگا و پارے کہ برتینٹ ہُر۔ شاہ محمود قریشی پارے کہ انت بھارت انڈیپینڈینٹ صحافی تے مقبوضہ کشمیر آ دیک کاہک۔ اوپارے کہ بھارت جہانی کانود نا خلاف ورزی کننگ ءِ، بھارت لین آف کنٹرول آ شاری آبادی تے شست کننگ ءِ، اقوام متحدہ تینا مبصرآتے ہم تعینات کرینے وخت اس کہ بھارت دافتے کچ اٹ تخک تانکہ او اوسُچائی ءِ خنپس۔ وزیر خارجہ پارے کہ اقوام متحدہ جنرل اسمبلی نا صدر دوشنبے آ پاکستان آ بننگ ءِ۔ ای اونا مون آ پاکستان نا موقف ءِ تخیوہ و اودے مچ آ حالیت آتیان معلومدار کیوہ۔ اوپارے کہ بنگلہ دیش تون نن گچین ہڑتوم آ تعلقداری تا خواہندار اُن، مستین نا خرینی تے است آن درسا گچین ءُ آخبت اس خوانہ، نن بنگلہ دیش اٹ پوسکن ءُ سفیر اس تعینات ہم کرینن۔ شاہ محمودقریشی پارے کہ پاکستان مرے، چین مرے نیپال مرے یا بنگلہ دیش مرے، بھارت نا پدریسہ تینا ہمسایہ غاتون تعلقداریک بے چیٹ مننگ ءُ۔ بھارت’’ہندوتوا‘‘ سوچ انا سوب آن ایلو علاقائی ملک آتون تعلقداری تے خراب کننگ ءِ، ایران ہم انڈیا ءِ چاہ بہار ڈٹ آن کشانے۔ شاہ محمود قریشی پارے کہ بھارت سرکار نا پالیسی تا سوب آن اسہ سال اٹ ’’شائننگ انڈیا‘‘ نا دروشم نا بیڑاغرق مسنے۔