اسلام آباد ۔ 22 جولائی (اے پی پی) مزن وزیر عمران خان ءَ عوامی جمہوریہ بنگلہ دیش ءِ مزن وزیر شیخ حسینہ ءَ را ٹیلی فون کتگ ءُ آئی ءَ گوں بنگلہ دیش ءِ تہ کورونا وائرس ءِ سبب ءَ بوتگیں بیرانیانی سرا اپسوز ءِ درشان کتگ ءُ وائرس ءِ تالانی ءِ گرودار ءِ ھاترا بنگلہ دیش حکومت ءِ نیمگا چہ گتگیں گاماں را ساڑاتگ۔ مزن وزیر کارگس ءَ چہ جاڑی بیان ءِ ردا دوئیں سروکاں کوویڈ۔19 ءِ سبب ءَ ودی بوتگیں چیلنجز ءَ گوں دیم دیگ ءِ ھاترا وتی وتی ملکانی تہ چست کتگیں گامانی باروا ھیال ریچی کتگ۔ مزن وزیر عمران خان ءَ شیخ حسینہ ءَ را وتی حکومت ءِ نیمگا چہ مہلوک ءِ زند ءُ نوکریانی رکھگ ءِ ھاترا چست کتگیں گامانی باروا سرپد کتگ۔آہاں بنگلہ دیش ءِ مزن وزیر ءَ را ڈویلپنگ کنٹریز ءِ وام پہلی کنگ ءِ ھوالہ چہ میاں اوستمانی تبک ءِ سرا بنگیج کتگیں گاماں چہ ءُ گپ ءُ تران چہ سرپد کتگ۔ مزن وزیر ءَ بنگلہ دیش ءِ تہ انوگیں ھار ءَ چہ بوتگیں جانی ءُ مالی تاوان ءِ سرا اپسوز ءُ ہمدردی ءِ درشان کتگ۔ آہاں اے قدرتی آفت ءَ چہ زوت بحالی ءِ ھاترا ھم نیکیں واھشتانی درشان کتگ۔ مزن وزیرعمران خان ءَ پاکستان ءُ بنگلہ دیش ءِ میان ءَ نزیکیں سیادی ءِ ھوالہ دیان ءَ دوئیں ملکانی میان ءَ دودیمی رھوت ءُ مہلوک ءِ تبک ءِ سرا ڈل آنی مٹ ءُ سٹ ءِ سرا زور مان کتگ۔مزن وزیر عمران خان ءَ سارک ءِ گوما پاکستان ءِ کمنٹمنٹ ءِ درشان کنان ءَ سوگو ءِ امن ءُ وشھالی ءِ ھاترا ریجنل کمک ءَ را گیش کنگ ءِ درگت ءَ دوئیں ملکاں گوں پج ءَ کار کنگ ءِ سرا زور مان کتگ۔آہاں مقبوضہ جموں و کشمیر ءِ تہ نگیگ بوتگیں جاورھال ءِ سرا پاکستان ءِ نکتہ نظر ءَ چہ ھم بنگلہ دیش ءِ مزن وزیر ءَ را سرپد کتگ ءُ خطہ ءِ امن ءُ وشھالی ھاترا کشمیر ءِ جیڈھ سرا پرامن ءِ حل ءِ ارزشت ءِ سرا زور مان کتگ۔ مزن وزیر عمران خان ءَ بنگلہ دیش ءِ مزن وزیر ءَ را پاکستان ءِ تروتاب ءِ دعوت ھم داتگ۔ پاکستان وت مہ وتی اعتماد، احترام ءُ بروبری ءِ بنیات ءِ سرا بنگلہ دیش ءَ گوں وتی براتیں سیادی ءَ را گیش مھکم جوڈ کنگ ءِ جزم ءِ درشان کتگ۔
