اسلام آباد۔ 22 جولائی (اے پی پی) وزیراعظم نا خصوصی کمکار سمندر پار پاکستانیز ذوالفقار عباس بخاری پارینے کہ پردیسی تے پاکستان اٹ زرکاری نا بابت رکھ، کٹیا کروک و سازگار ماحول اس تننگ وزیراعظم نا اولیت ءِ، اوداہیت ءِ پاکستان تحریک انصاف اسکاٹ لینڈ ایسٹ نا صدر فخر اقبال چوہدری تون داڑے اوڑدہی ٹی پارے۔ داوخت آ قومی اسمبلی نا باسک طاہر اقبال چوہدری ہم ساڑی ئس۔ اوڑدہی ٹی فخر اقبال خصوصی کمکار ءِ جہانی دین کورونانا سوب آن سمندر پار رہینگوک آ پاکستانی تے مون تروک ویل آتیان معلومدار کرسا پارے کہ حکومت نا کنڈآن کورونا دین انا سوب آن پیشن نا ملک آتیٹی اختہ پاکستانی تے وطن آ پدی اتنگ کن کروک آ گام گیج آک ستاکڑزرہ۔ اوڑدہی ٹی گپ وتران کرسا زلفی بخاری پارے کہ اوورسیز پاکستانی تا کنڈآن ترسیلات زر انا دروشم اٹ مون تروک آ سرمایہ ملکی زرگزران کن تمبہ نا حیثیت تخرہ۔ پردیسی تے پاکستان اٹ زرکاری نا بابت رکھ، کٹیا کروک و سازگار ماحول اس تننگ وزیراعظم عمران خان نا اولیت ءِ، اوڑدہی ٹی فخر اقبال چوہدری زلفی بخاری آن خواست کرے کہ پنجاب اوورسیز پاکستانیز کمیشن نا وڑآ بنجائی حکومت ہم ادارہ اس جوڑ کے تانکہ پنجاب آنبار مچ آ ملک اٹ اوورسیز پاکستانی تا ویل آک اولیتی بنداو تیا ایسر مننگ کیر۔ اوخصوصی کمکار ءِ پارے کہ گلاسگو/ایڈنبرااسکاٹ لینڈ آن پاکستان کن براہ راست جہاز آتیکن گام گیج کننگے و بالی پٹ آتیا پیشن نا ملک آتیان بروک آ بندغ آتا عزت و شرف و آسراتی تا فراوانی ءِ ہم پک کننگے۔ فخر اقبال چوہدری پارے کہ ہر مشکل مرحلہ ٹی اوورسیز پاکستانیک وطن عزیز تون مہرومریبت نا درشانی ءِ کرینو۔ حکومت پردیسی تے پاکستان اٹ زرکاری نا ترغیب تننگ کن خصوصی پیکج اسے نا پڑوءِ کے۔
