اسلام آباد۔ 22 جولائی (اے پی پی) پاکستان و چین نا آجو واپار نا معاہدہ (ایف ٹی اے) آن پد چین ءِ کروک آ ملکی برآمد آتیٹی 6 درسد ودکی مسنے۔ چائنہ اکنامک نیٹ انا رپورٹ نا رداٹ داوخت آ چین پاکستان نا ارٹ میکو بھلا درآمدی منڈی ءِ ہرادے کل برآمد آتا 7 درسد بشخ برآمد کننگک وخت اس کہ پاکستان نا برآمد آتیٹی امریکہ نا بشخ 16.7 درسد ءِ وامریکہ پاکستان آن برآمد کروک آ بھلا ملک ءِ۔ رپورٹ نا رداٹ پاکستان وچین نا نیام اٹ ایف ٹی اے آن مست ہمسایہ ملک آتا تین پہ تینی واپار اٹی پاکستانی برآمدآک 19 درسد ئسر ہرا آجو واپار نا معاہدہ غان پد ودسا 26 درسد مسنو۔ ہنداوڑ چنکو وخت اسے ٹی برآمد آتیٹی 6 درسد ودکی مسنے۔ چین نا حکومت پاکستان تون واپار نا مون آ دننگ ءِ بھاز اہمیت ایتک و اوپاکستان آن پین درآمد آتا اومیت کننگ ءِ۔ رپورٹ نا رداٹ چین پاکستان آن میوہ و سوزی تیان بیدس ایلو کشاری اجناس درآمد کیک وخت اس کہ پاکستان مشینری نا درآمد آتا کمک اٹ تینا پیدوار لائخی تیٹی ودکی کننگ ءِ۔ رپورٹ نا رداٹ چین اٹی پاکستانی امب، پٹاٹہ، خولم، برنج و ترشاوہ میوہ غاتا بھلو خواست اس ارے و اومیت ءِ کہ سی پیک ڈٹ آن پاکستانی برآمد آتیٹی نمان ودکی مریک۔
