اسلام آباد۔ 22 جولائی (اے پی پی) جہانی مالیاتی فنڈ(آئی ایم ایف) پارینے کہ اسٹیٹ بینک آف پاکستان (ایس بی پی) چنکا و نیامی درجہ نا کاروباری ادارہ غاتا شعبہ (ایس ایم ایز) اٹی 1900 ایس ایم اے تیٹی 123 ارب روپئی بشخانے۔ ایس ایم ایز ءِ وام تا فراوانی نا مسخت کاروبار ءِ مالی وسیلہ غاتیان بچفنگ و کارندہ غاتا روزگار نا رکھ ءِ۔ آئی ایم ایف نا تازہ انگا حوال نا رداٹ پاکستان مارچ 2020ء آن ہلیس کوویڈ۔ 19 نا منفی زہم تے کم کننگ کن جامع گام گیج کننگے۔ ایس ایم ایز ءِ 123 ارب روپئی نا آسان وام تا فراوانی آن بیدس حکومت نا پارت آ ایس بی پی نا گام گیج آتا رداٹ بینک آک تینا صارف آتیان 605 ارب روپئی نا وام تا ہلنگ ءِ ہم اسہ سال اکن پدبٹینے تانکہ ملک اٹی اقتصادی گچینی ءِ پائیدار کننگ مرے۔ آئی ایم ایف پارے کہ اسٹیٹ بینک ایلو آسراتی تیٹی گچینی کن 28 ہسپتال آتے 601 ارب روپئی نا وام کم شرح سود آ فراوان کننگ آن بیدس پوسکن آمینو فیکچرنگ پلانٹ ومشینری پین پین نا ہلنگ کن 27 جتا پوسکن آ ڈٹ آتیکن 11 ارب روپئی نا وام ہم فراوان کننگانے۔ داکان بیدس ایس بی پی ملک اٹی تعمیرات نا بشخ انا سرجزآتیکن بینک آتے دسمبر 2021ء اسکان نجی بشخ ءِ تروک آ وام تا کم از کم پنچ درسد نا بریبر وام فراوان کننگ نا ہم پارت کرینے۔ حوال نا رداٹ تعلیمی ادارہ غاتا ہم 15 ستمبر اسکان ملنگ نا گمان ءِ۔ کورونا وائرس نا دین انا تالانی ءِ توننگ وکاروباری سرجزآتا بحالی کن صوبہ غاتا سلابت اٹ لاک ڈاؤن اٹ نرمی و سمارٹ لاک ڈاؤن نا گام گیج کننگ انگ ءِ ہراڑآن ملک اٹی زرگزرانی سرجزآتا بحالی ٹی کمک رسینگانے۔
