اسلام آباد ۔ 20جولائی (اے پی پی) پاکستان تحریک انصاف ءِ حکومت ءِ نیمگ ءَ احساس پاکستان ءَ گریبی ءِ ھلاسی، چاگردی ءِ گریبیں مردم ءُ بزگریں مردم آنی کمک ءُ ایشاناں مالی رنگ ءَ وشھال جوڑٰ کنگ ءِ واستہ بندات کنگ بوتگ انوگ ءَ تاں درستاں چہ مستریں پروگرام انت۔ گوستگیں 72 سال آنی تہ ءَ ایش شاھیگان تریں ءُ ٹوھیں بجٹ انت چہ ادا السی گہبود ءُ بزگری پروگرام ایشی ءَ چہ پیسر اچ حکومت ءِ نیمگ ئَ جاڑی کنگ نہ بوتگ۔ مزن وزیر عمران خان بندات ءَ چہ گریبی ءِ ھلاسی ، چاگرد ءِ ھمزوریں مردم آنی زندمان ءِ تہ ءَ وش ءُ آسودگی کنگ، وانگ ءُ زانگ ءِ دیرموئی ءُ بنی آدم آنی قدرتی آسراتی آنی گہتریں رنگ ءَ کارمردی ءِ سر ءَ زور دیگ ءَ بوتگ ءُ اے ٹک پاکستان تحریک انصاف ءِمنشور ءِ بھر انت۔ 2018 ءِ لس گچین کاری ءَ کامیاتی ءَ چہ پد حکومت ءِ سیٹ ءَ نندگ ءَ چہ مزن وزیر عمران خان ءَ گریبی ءِ ھلاسی، چاگردی ءِ ھمزوریں تبک ءِ زندمان ءِ کد ءُبالاد ءِ گہتری ، وانگ ءُ زانگ ءِ دیمروئی ءُ بنی آدمی آسراتی آنی جوانیں رنگ ءَ کارمردی ءِ پالیشی جوڑ کنگ ءِ سر ءَ ھاسیں دلگوشی دیگ ءَ انت ءُ اے ارزشتی ایں ایجنڈا آنی سرجمی ءِ واستہ آئی ءَ 27 مار 2019 ءَ احساس پروگرام ءِ بنگیج کتگ۔ مزن وزیر عمران خان وتی گشتانک ءُ میڈیا ءِ گوما گپ ءُ تران آنی تہ ءَ دمپہ ساھت درور دنگ کہ کجام رنگ ءَ چین ءَ گریبی ءِ ھلاسی ءِ واستہ چتور بزگر آناں رکھینتگ ءُ وشھال کتگ ھمے رد ءَ چین دیمروئی ءِ کشک ءَ گام جنان ءَ دگنیا ءِ درستاں چہ مستریں معاشی ھاٹیگ جوڑ بوھگ ءَ انت۔ اے تجروبت ءِ رد ءَ احساس ءِ چیر دستی ءَ زرّ ءِ بھر ءُ بانگ ءَ را ساپ ءُ سلہ کنگ بوتگ ۔ ءُ نادرا ءِ ڈیٹا ءَ چہ سرجمیں سکروٹنی ءَ چہ پد مردم آناں اے پروگرام ءَ چہ سیت مند بوھگ ءَ موہ دداتگ۔ احساس ءِ چیر دستی ءَ انوگ ءَ تاں جاڑی بوتگیں پروگرعام آنی تہ ءَ احساس کیش ایمرجنسی کیش ، احساس راشن پورٹل ، احساس سکالرشپ، احساس پناہ گاہ ءُ احساس لنگر، احساس کفالت، احساس بے سُتی وام ءُ احساس آمدن ءُ مڈی آنی ٹراسفر پروگرام ھوار انت ءُ ایشانی چیر دستی ءَ انوگ ءَ تاں ارب ءُ کھرب آنی زرّ بھر ءُ بانگ کنگ بوتگ انت۔ ایشی ءَ چہ کروڑانی مردم سیت منت بوھگ ءَ انت۔ ساپ ءُ سلہ ئی ءِ گوما احساس ءِ یک ٹوھیں بھر ءِ کار ترندی ءَ گوں جاڑی انت۔ نوکیں ٹیکنالوجی ءِ کارمردی ءِ سبب ءَ احساس ءِ توامیں پروگعام آنی تہ ءَ بندات ءَ چہ بگر ریلیف دیگ ءَ تاں بھر بھر آنی تہ ءَ کار ترندی ءَ گوں سرجم کنگ بوتگ۔ ایشی ءِ جوانتریں درور کورونا ھوپ ءِ ساھت ءَ بندات کتگیں احساس ایمرجنسی کیش پروگرام انت ایشی ءِ بنگیج، دستبنی آنی جم کنگ، ایشانی پٹ ءُ پول ءُ پکوئیں پینگ آناں دور کنگ ءَ چہ پد کمک ءِ پجاری توامیں کار سئے ماھے لُکوکیں وھد ءُ پاس ءِ تہ ءَ سرجم کنگ بوتگ ءُ 17 جولائی ءَ تاں 1 کروڑ 29 لکھ 51 ہزار مردم آناں 156 ارب 70 کروڑ کلدار ءِ زرّ بھر ءُ بانگ کنگ بوتگ۔ ایشی ءِ سرجمیں ھال چو اے وڑی ءَ انت۔ سندھ ءَ 38 لکھ 94 ہزار ءَ چہ گیش مردم آناں 45 ارب 95 کروڑ کلدار ءَ چہ گیش بھر ءُ بانگ کنگ بوتگ۔ صوبہ پنجاپ ءَ 58 لکھ 31 ہزار ءَ چہ گیش مردم آناں 70 ارب 56 کروڑ کلدار زر بھر ءُ بانگ کنگ بوتگ۔ خیبر پختونخوا ءَ 22 لکھ 8 ہزار ءَ چہ مردم آناں 26 ارب 81 کروڑ کلدار ءَ چہ گیش بھر ءُ بانگ کنگ بوتگ۔ بلوچستان ءَ 6 لکھ 44 ہزار ءَ چہ گیش مردم آناں 7 ارب 83 کروڑ کلدار ءَ چہ گیش زر بھر ءُ بانگ کنگ بوتگ۔ آزات جموں کشمیر ءَ 2 لکھر 11 ہزار ءَ چہ گیش مردم آناں 2 ارب 58 کروڑ کلدار ءَ چہ گیش زرّ بھر ءُ بانگ کنگ بوتگ۔ گلگت بلتستان ءَ 93 ہزار مردم آناں 1 ارب 14 کروڑ کلدار ءَچہ گیش بھر ءُ بانگ کنگ بوتگ ءُ اسلام آباد ءَ 66 ہزار ءَچہ گیش مردم آناں 80 کروڑ کلدار ءَچہ گیش مردم آناں زرّ بھر ءُ بانگ کنگ بوتگ۔ بھر ءُ بوتگیں زراں 1.26 ارب کلدار پہ کفالت پشت کپتگیں زرانی دیئگ ءِ ھاترءَ ہوار اَنت۔
احساس ءِ ردءَ بازیں پروگرام آنی بندات کنگ ءِ وہدءَ اے گپ ءِ حاس حیال داری کنگ بوتگ کہ نیزگاری ءَ کمی ءُ چاگرد ءِ نیزوریں تبک ءِ گہتری ءِ ھاترءَ درائیں رھبند کارمرز کنگ بہ بنت۔ یک نیمگے ءَ کورونا لاک ڈاؤن ءُ بیپار ءِ بندش ءِ سوب ءَ چہ بے روزگار بوتگیں نیزگاریں مردماں شُد ءُ ہم شامی ءَ چہ رکینگ ءِ ھاترءَ 12 ہزار کلدار ءِ کمک دیئگ بوتگ ءُ دومی نیمگ ءَ کورونا لاک ڈاؤن ءِ وہد ءَ نیزگاریں تبک ءَ را شُد ءُ نیزگاری ءَ چہ رکینگ ءِ ھاترءَ احساس راشن پورٹل ءِ بندات کنگ بوتگ کہ ایشی ءِ تہ ءَ احساسءِ کرد است مندیں ادارگ ءُ مردم ءُ نیزگاری حقداریں مردمانی نیام ءَ نزیکی کنائینگ ءُ آسراتی دیئگ ءِ بوتگ۔ حکومتِ پاکستان ءِ بنکی کرد سرجمیں حقدارانی معلومداری سرکنگ ءُ گوں ڈونرآں آوانی نزیکی کنائینگ بوتگ۔ حقدار ءُ ڈونر تنظیم دوئیں پورٹل ءَ وت ءَ را رجسٹرڈ کنگ ءِ ھاترءَ وتی معلوم داریاں دیاں۔ حقدار ءُ ڈونرز a www.rashan.pass.gov.pk ءِ سرءَ وتءَ را رجسٹرڈ کُت کناں۔ حقدارانی معلومداری زورگ بنت ءُ احساس ڈیٹا ءَ را کارمرز کنگ بیت آوانی چارءُ تپاسی کنگ بیت۔ ڈونر ٹنظیم آں پروگرام ءَ شریدار جوڑ کنگ ءِ ھاترءَ حاسیں بودینکی ءُ زانکاری ءِ معیار ءِ ردءَ چکاسگ بیت۔ احساس راشن پورٹل ءِ ردءَ تاں انوں 738869 مردماں راشن کمک ءِ ھاترءَ رجسٹرڈ بوتگ اَنت کہ ءُ ضلورت مندیں مردماں راشن دیئگ بندات بوتگ۔
احساس سکالرشپ ءِ چیر دستی ءَ کم آمدنی والا ایں مردم آں گوں سیادی داروکیں بلدیں نودربر آناں مزن تکی وانگ ءُ زانگ ءِ ھیل کنگ ءِ موہ پجارینگ ءِ واستہ ھمک سال 50 ہزار انڈر گریجویٹ نودربر آنی واستہ وانگ ءُ زانگی وظیفہ آنی بنگیج کنگ بوتگ۔ چار سال ءِ تہ ءَ اے کساس دولکھ ءَ تاں سر بیت ءُ ایشی ءِ تہ ءَ 50 درسد کوٹہ جنکیں نودربر آنی واستہ ھاس انت۔ انڈر گریجویٹ سکالرشپ پروگرام مزن وانگ ءُ زانگ ءِ تک ءَ رسائی ءَ را شاھیگانی دیگ ءِ واستہ یک ٹوھیں گام ات۔ ایشی ءِ چیر دستی ءَ حکومت اے گپ ءِ واھشت ایگ انت کہ اچ نودبر مالی ھرچ ءُ درچ ءِ گیش بوھگ ءِ سبب ءَ چہ وانگ ءُ زانگ ءِ ھیل کاری ءَ زبھر مہ بیت۔ ایشی ءَ تہ ءَ ٹیوشن فیس ءُ وظیفہ دوئیں ھوار انت۔ نودربر آنی واستہ 50 درسد وظیفہ گیشینگ بوتگ ءُ ضلورت اے گپ ایگ انت کہ ءُ کم دیمروئی کنوکیں ءُ دور ءُ گستائیں دمگ آنی نندوکیں نودربر آنی ھاسیں رنگ ءَ دلبڈی کنگ بوھگ ءَ انت۔ نودربر http://ehsas.hec.gov.pk ءِ سر ءَ آن لائن یا سرجمیں کاگد آنی ھمبراھی ءَ دزبندی فارم آں وتی سیادی داروکیں یونیورسٹی ءِ مالی کمکی کارگس ءَ جم کنائینت کت کناں۔
ملک ءِ ٹوھیں شہر آنی مزنیں کساس ءِ مردم گرینی ءِ سبب ءَ سڑک ءِ کر ءُ کشاں ، فٹ پاتھ ، پارکس ءُ پچیں جاھ ءَ وپسگ ءَ مجبور انت۔ ایش توامیں موسم آں تل پچی آزمان ءِ چیر ءَ نشتگ انت۔ مزن وزیر عمران خان ءَ اے جاور ھال آنی رد ءَ ملک ءِ ٹوھیں شہر آنی تہ ءَ پناہ گاہ آنی جوڑیشت ءِ لیکہ پیش کت ءُ ایشرا پکوئیں رنگ دیگ بوت ، اسلام آباد، لاہور ، کراچی، پشاور، ملتان ءُ ایندگر ٹوھیں شہر آنی تہ ءَ پناہ گاہ جوڑ کنگ بوت ادا گریب ءُ بے کسیں مردم وتی شناختی کاٹ ءِ پیش دارگ ءَ چہ پد مفت ءَ نندگ ءِ موہ دیگ بیت۔ ایشیءَ پد پروگرام ءَ را دیم ءَ جنزینان ءَ اے پناہ گاہ آنی گوما دگہ ایندگر جاھ آنی تہ ءَ مزن مزنیں ہسپتال آنی گوما لنگر خانہ جوڑ کنگ بوتگ۔ انوگ ءَ تاں پبلک پرائیویٹ شریکداری ءِ چیر دستی ءَ پنجاپ ، سندھ، خیبر پختونخوا ءُ اسلام آباد ءَ لنگر خانہ پچ کنگ بوتگ۔ مزن وزیر عمران خان ءَ “احساس سیلانی لنگر” سکیم ءِ بنگیج اسلام آباد ءَ 7 اکتوبر 2019 ءَ کت۔ اے موہ ءِ سر ءَ مزن وزیر عمران خان ءَ گوشت کہ سرجمیں ملک ءَ اولی بھر ءَ 112 لنگر خانہ پچ کنگ بوتگ۔ اے لنگر خانہ ھما دمگ آنی تہ ءَ پچ کنگ بوتگ انت ھمودا بزگر، بے روزگاری ءُ شدیکی ءِ آماچ انت۔ آئی ءَ گوشت کہ حکومت کاروبار ءُ صنعت آنی دیمروئی ءِ واستہ ھمک رنگیں کمک پجاری کنگ ءَ انت، مشکلیں وھد ات بلے مارا ھمزوریں مردم آنی سما ءُ احساس انت۔ ءُ مئے کوشست انت کہ مردم شدیک مہ بنت۔
زالبول مئے آباتی ءِ نیم بھر ءَ چہ گیش انت بلے وانگ ءُ زانگ ءُ ایندگر پڑاں پشت کپگ ءِ سبب ءَ ایش چاگردی ءِ دیمروئی ءَ جوانیں کرد پیلو نہ کنگ ءِبرابر ءَ انت۔ اے زالبول آنی جاور نہ گیگ انت ءُ مے جنوزام دومی سانگ ءُ سور ھم کت نہ کناں ءُ کار کت ءُ وت کمائینت نہ کناں۔ چاگرد ءِ اے تبک ءِ گہبود ءِ واستہ احساس کفالت پروگرام ءِ بنگیج 31 جنوری 2020 ءَ کنگ بوتگ۔ اے پروگرام ءِ چیر دستی ءَ انوگ ءَ تاں 4576463 بزگریں زالبول سیت مند بوتگ انت۔ اے پروگرام ءِ چیر دستی ءَ 70 لکھ زالبول آناں کفالت کارڈ دیگ بوھگ ءَ انت۔ حکومت لوٹ ایت کہ 200 ارب کلدار یک شلی ءَ بزگریں مردم آں تاں بہ پُج ایت۔ اے ھوالگ ءَ ڈاکٹر ثانیہنشتر ءَ گوشت کہ بی آئی ایس پی ءِ ھساب ءُ داد آنی رد ءَ 10 سال کوھن بوتگ انت، استیں حکومت ءَ یک شلی ءَ سروے ءُ نادرا ءِ ڈیٹا بینک ءَ چہ بزگر آنی گچین کنگ بوتگ، احساس کفالت پروگرام ءِ واستہ دو بینک آنی گوما منوگر کنگ بوتگ، احساس کفالت پروگرام 100 درسد بائی میٹرک انت، بزگریں زالبول آنی بینک آں تاں رسائی ءِ کار ءَ را آسان جوڑ کنگ بوتگ
نیشنل پاورٹی گریجویشن انیشی ایٹو“ ءَ ٹوھیں سرجمیں ملک ءِ پروگرام یکیں وھد ءَ 100 درسد ءَ چہ گیش ضلع آنی تہ ءَ ساڑاھگ بوتگ۔ اے پروگرام ءِ چیر دستی ءَسُت ءَ چہ پاک وام، کزبی کار ءُ فنی ھیل کاری ءِ آسراتی پجاری کنگ بوھگ ءَ انت۔ نیشنل پاورٹی گریجویشن انیشی ایٹو ءِ کساس 42 ارب 65 کروڑ کلدار جنگ بوتگ ایشی ءِ مول ءُ مراد بزگریں مردم آناں پھریزگ ءُ دیمروئی ءِ کشک ءَرھادگ کنگ انت۔ پروگرام ءِسئے ٹوھیں بھر انت، مڈی آنی بھر ءُ بانت، بے سُت ءَ وام ءِ پجاری ءُ ءُ مڈی آںی جوانیں ءَ گوں کارمردی ءِ واستہ بلدکاریں مردم آناں ہنر سکارینگ ھوار انت۔ اے پروگرام ءِ بنیاتی مول ءُ مراد بزگریں مردم آناں زکوۃ، بیت المال ءُ بے نظیر انکم سپورٹ پروگرام ءِ بڈو بوھگ ءَ چہ آزات کنگ ایشاناں وت مستر جوڑ کنگ ھوار انت ۔ اے پروگرام ءَ چہ ایشائی دیمروئی بینک ءُ میاں اوستمانی مالیاتی فنڈ برائے کشت ءُ کشاری ءِ دیمروئی ءِ کمک گون بیت۔ اے پروگرام ءَ را 100 ضلع آنی تہ ءَ 16.28 ملین مردم سیت مند بنت ایشانی تہ ءَ 50 درسد زالبول ھوار انت۔ 25 ہزار مردم مڈی آنی بھر ءُ بانگی پروگرام ءِ تہ ءَ ھوار انت۔ ایشی ءَ ابید ایشاناں کامیات کاروبار چلائینگ ءِ واستہ فنی ءُ کاروباری ھیل کاری ھم پجاری کنگ بوھگ ءَ انت ءُ کساس پنجاھ ہزار مالیت ءِ مڈی پجاری کنگ بیت۔ ایشی ءَ ابید بے سوت ءَ وام ءِ دیگ ۔ مڈی آنی تہ ءَ 1.45 ملین مردم سیت مند بنت۔ احساس آمدنی پروگرام ءِ بنگیج 21 فروری 2020 ءَ بوتگ۔ اے پروگرام ءِ چیر دستی ءَ انوگ ءَ تاں 25,054 ھاندان ءَ را 1.5 ارب کلدار مالیت ءِ کسانیں کاروباری مڈی پجاری کنگ بوتگ۔
احساس پروگرام ءِ چیر دستی ءَ مزن وزیر ءَ 10 مارچ 2020 ءَ را احساس ضلعی پورٹل ڈیٹا فار پاکستان ءِ بنگیج کتگ۔ اے پورٹل ءِ جوڑیشت حکومت ءِ راستی آنی رد ءَ بنجاھی، صوبائی ءُ ضلعی تک ءَ اے ادارگ آنی پیسلہ جوڑیشت ءِ کار ءَ ارزشتی ایں گام ات۔
احساس پروگرام ءِ ھوالگ ءَ چہ اے پی پی ءَ گوں تران کنان ءَ لاہور چیمبر آف کامرس اینڈ انڈسٹری ءِ صدر عرفان اقبال شیخ ءِ گوشگ انت کہ من پاکستان ءِ 72 سالی راجدپتر ءَ ایشی ءَ چہ گیش ساپ ءُ سلہ ئی ءُ ایشی ءَ چہ گیش گہتریں پروگرام نہ دیستگ۔ ایشی ءَ چہ کروڑانی مردم آناں سیت رسیت۔ درستاں چہ گہتریں گپ ایش انت کہ مردم آناں آوانی گس آنی توک ءَ پیسہ دیگ بوھگ ءَ انت۔ ایشرا سرجمیں رنگ ءَ ساپ ءُ سلہ کنگ بوتگ۔ آئی ءَ گوشت کہ اولی بھر کامیاتی ءَ گوں سرجم بوھگ ءَ پد مزن وزیر ءَ را ایشی یے دومی دومی بھر ءِ جار جتگ، امیت انت کہ دومی بھر ھم اولی بھر ءِ وڑ ءَ کامیاتی ءِ گوما مردم آناں سیت پجار این ایت، لاہور چیمبر وت ھم ایشی ءِ تہ ءَ گیشاں چہ گیش بھر زوری کنگ ءَ انت، ما مزن وزیر ءَ را فنڈ ءِ تہ ءَ دو کروڑ کلدار، سر وزیر ءِ فنڈ ءِ تہ ءَ یک کروڑ کلدار ءُ گونر پنجاپ ءِ فنڈ ءِ تہ ءَ کمک جم کنائینتگ ءُ ما وت ھم ایشی ءِ سر ءَ کار کنگ ءَ آں ءُ ورگ وارینگ ءَ آں۔ عرفان اقبال شیخ ءَ گوشت کہ ھمے رنگ ءَ اللہ پاک ءِ مخلوق ءِ ازمت کنگ بوتگ ایشی ءِدرور پیسر ءَ گندگ نہ بیت۔ مارا امیت انت کہ اے پروگرام گیش کامیات بیت ءُ ما دل ءُ جان ءِ گوما ایشی ءِ گوما آں۔ اسلام آباد چیمبر آف کامرس اینڈ انڈسٹری ءِ ایگزیکٹو ممبر بابر چوہدری گوشیت کہ مزن وزیر عمران خان ءِ حکومت ءَ ھمے احساس پروگرام بندات کتگ اے شریں گپ ات۔
