احساس پروگرام
مٹ وبدل، سعادت خان محمدحسنی
احساس پاکستان اٹی نیزگاری نا چٹفنگ، راج انا نیزگار و نزور تپہ غاتا کمک و اوفتے مالی وڑاٹ شونہال کننگ کن بناکننگا، داوخت اسکان نا غٹ آن بھلا پروگرام ءِ۔ تدوک آ 72 سال اٹی داخہ دربھلو فائدہ ئی بنداو اسے آ و بھلا بجٹ نا السی آسراتی و نیزگاری نا چٹفنگ نا پروگرام اس داکان مست اسہ حکومت اس ہم کتنے۔ وزیراعظم عمران خان اولیکو دے آن نیزگاری نا چٹفنگ، راج انا نزور تپہ غاتا زند انا آب ءِ بڑزکننگ، تعلیم نا مون آ دننگ و انسانی و قدرتی وسیلہ غاتا گچین کاریم اٹ اتنگ آ زورشاغسا کرینے و دا ٹک آک پاکستان تحریک انصاف نا منشور نا ہم اہم ءُ بشخ اسے ءُ۔ 2018 ء نا لس گچین کاری تیٹی سرسہبی آن پد حکومت ءِ سنبھالنگ تون وزیراعظم عمران خان نیزگاری نا چٹفنگ، راج انا نزور تپہ غاتا زند انا آب ءِ بڑزکننگ، تعلیم نا مون آ دننگ و انسانی و قدرتی وسیلہ غاتا گچین کاریم اٹ اتنگ کن پالیسی جوڑ کننگ آ چکار کرے و دااہم ایجنڈا نا پوروی کن او 27 مارچ 2019 آ احساس پروگرام نا بناءِ کرے۔ وزیراعظم عمران خان تینا تران و میڈیا تون گپ وتران اٹ وار وار آ چین نا دَرور ءِ ترسا کرینے کہ ہراوڑ چین نیزگاری نا کہول آ شیف زند ءِ تیرکروک آ کم و ود 70 کروڑ آبادی ءِ نیزگاری نا لکیر آن کشا ہراڑآن چین شونداری نا کسر آ ہنسا دنیا نا غٹ آن بھلا زرگزرانی واکدار مننگ ءِ۔ ہنداسوچ انا رداٹ اواحساس کون آ ہمہ جہتی پروگرام نا بناءِ کرے تانکہ نیزگارخاص وڑاٹ زالبول ءِ نیزگاری نا لکیر آن کشنگے، نیزگار تپہ غاتا ہُشار چناتےکن بڑزکو تعلیم نا وارخواہی ودی کننگے، ملک اٹی کاروباری ماحول اس ودی کننگے تانکہ ہرا ورناک ملازمت پٹنگ نا جاگہ غا کاروبار و انٹرپرینیورشپ انا کنڈآ چکارکیر۔
مستین مروک آ نیزگاری نا چٹفنگ نا پروگرام تیٹی غٹ تر چکار نغد زرتس نا کنڈآ ئس و دافتیان ہم بھلو زراس حقی حقدار آتسکان سرمننگ کتورہ۔ دانا غٹ آن بھلا دَرور بینظیر انکم سپورٹ پروگرام ءِ ہرادے ساف انگا پروگرام گوندسا کننگانےولے ساڑی حکومت نادرانا ڈیٹا غان دانا جانچ پڑتال ءِ کرفے تو داوڑنا 8لکھ بندغ پاش مسر ہرااسہ وڑاسے ٹی ہم حقدار الور و دافتے ٹی سرکاری آفیسر آتون اوار بھلو کچ اسے ٹی سرکاری ملازم و اوفتا خاہوک آک اوار ئسر ہرافتے حقدار آتا مہشون آن کشنگا۔ داآزموندہ ءِ مون آ تخسا احساس نا رداٹ زرتننگ اٹ شفافیت ءِ مرکزی ءُ حیثیت اس تننگانے و نادرا نا ڈیٹا غان پورو سکروٹنی آن پد مخلوق ءِ دا پروگرام آن فائدہ ہرفنگ نا موکل تننگانے۔ احساس نا رداٹ داتم اسکان پروگرام تیٹی احساس کیش ایمرجنسی کیش، احساس راشن پورٹل، احساس سکالرشپ، احساس پناہ گاہ و احساس لنگر، احساس کفالت، احساس بے سود وام و احساس آمدن و اثاثہ جات منتقلی پروگرام اوار ءُ و دافتارداٹ داتم اسکان کھرب آ روپئی تننگانے ہرافتیان کروڑ آ مخلوق فائدہ ہرفنگ ءِ۔
شفافیت تون اوار اوار احساس نا اسہ بھلو اہم ءُ پلو اس کاریم اٹ ترند رفتاری ہم ارے۔ پوسکن آ ٹیکنالوجی نا کاریم اٹ اتنگ نا سوب آن احساس نا غٹ پروگرام تیٹی بناء غان ہلیس زرتس اسکان نا مرحلہ غاتے ترند رفتاری اٹ پورو کننگانے۔ دانا جوان انگا دَرور کورونا دین آن پد بناکروک آ احساس ایمرجنسی کیش پروگرام ءِ ہرانا بناءِ کننگ، درخواست ہلنگ، اوفتا جانچ پڑتال و عملی اڑاند آتے مُر کننگ آن پد زرتس انا غٹ تر عمل ءِ مسہ تُو انا گونڈءُ وخت اسے ٹی پورو کننگا و 10 جولائی اسکان 1 کروڑ 26 لکھ 23 ہزار آن زیات بندغ آتے ٹی 152 ارب 75 کروڑ روپئی آن زیات زر بشخنگانے۔ دافتا سرجم گڑاس داوڑاٹ ءِ کہ صوبہ سندھ اٹی 37 لکھ 58 ہزار آن زیات بندغ آتیٹی 45 ارب 33 کروڑ روپئی بشخنگانے۔ صوبہ پنجاب اٹی 57 لکھ 14 ہزار آن زیات بندغ آتیٹی 69 ارب 15 کروڑ روپئی آن زیات زر بشخنگانے۔ خیبر پختونخوا ٹی 21 لکھ 54 ہزار آن زیات بندغ آتیٹی 26 ارب 16 کروڑ روپئی آن زیات زر بشخنگانے۔ بلوچستان اٹی 6 لکھ 34 ہزار آن زیات بندغ آتیٹی 7 ارب 70 کروڑ روپئی آن زیات زر بشخنگانے۔ آزاد جموں و کشمیر اٹی 2 لکھ 5 ہزار آن زیات بندغ آتیٹی 2 ارب 50 کروڑ روپئی آن زیات زر بشخنگانے۔ گلگت بلتستان اٹی 90 ہزار آن زیات بندغ آتیٹی 1 ارب 10 کروڑ روپئی آن زیات زر بشخنگانے و اسلام آباد اٹی 66 ہزار آن زیات بندغ آتیٹی 80 کروڑ روپئی آن زیات زر بشخنگانے۔ بشخوک آ زر اٹی 1.26 ارب روپئی ولشتی زرتس ہم اوار ءِ۔
احساس نا رداٹ چندی پروگرام تا بناءِ کرسا دا ہیت انا خاص خیال ءِ تخنگانے کہ نیزگاری ٹی کمتی و راج انا نزور تپہ غاتا گچینی کن غٹ آپشن تے کاریم اٹ اتنگے۔ اسہ کنڈآ کورونا لاک ڈاؤن و کاروبار نا بند مننگ نا سوب آن بے روزگار مروک آ نیزگار بندغ آتے بین و فاقہ کشی آن بچفنگ کن 12 ہزار روپئی نا نغد امداد تننگانے تو ایلو کنڈآ کورونا لاک ڈاؤن اٹی نیزگار تپہ غاتے بین و فاقہ کشی آن بچفنگ کن احساس راشن پورٹل نا بناءِ کننگانے ہراٹی احساس نا کڑد خیراتی ادارہ و بندغ و حقدار آتا نیام اٹ رابطہ کار و کمکار نا ءِ۔ حکومت پاکستان نا بنداوی کڑد اہل حقدار آتا ڈیٹا تننگ و ڈونرآتون اوفتا رابطہ ءِ برجاتخفنگ اسکان کننگانے۔ حقدار و ڈونر تنظیمک ہڑتوم آ پورٹل اٹی اندراج کن درکار معلومداری فراوان کیرہ۔ حقدار و ڈونرزwww.rashan.pass.gov.pk آ تینے رجسٹرکرفنگ کیرہ۔ حقدار آتا معلومداری تے پک کننگک و احساس ڈیٹا ءِ کاریم اٹ اتسا اہلیت نا تعین ءِ کننگک۔ ڈونرتنظیم تے پروگرام اٹی شریدار کننگ کن خاص اہلیت نا آب انا رداٹ ہُننگک۔ احساس راشن پورٹل آ داتم اسکان 738869 بندغ راشن امداد کن تینے رجسٹرکرفینو و ضرورت مند بندغ آتیٹی راشن نا بشخنگ بناکرینے۔
احساس سکالر شپ انا رداٹ کم کٹیا کروک تپہ غان تعلق تخوک آ ہُشار طالب علم آتے بڑزکو تعلیم نا وارخواہی تننگ کن سالانہ 50 ہزار انڈر گریجویٹ طالب علم آتیکن تعلیمی وظیفہ اس جاری کننگانے۔ چار سال اٹی دا کچ اِرا لکھ اسکان سرمریک و داٹی 50 درسد کوٹہ مسن تیکن جتاءِ۔ انڈرگریجویٹ اسکالر شپ پروگرام بڑزکو تعلیم اسکان رسینگ ءِ ودفنگ کن اسہ بھلو گام گیج اسے ہرانا رداٹ حکومت داہیت انا خواہندار ءِ کہ اسہ طالب علم اس ہم مالی خڑچ آتا سوب آن تعلیم آن سلپ۔ داٹی ٹیوشن فیس و وظیفہ ہڑتوم آک اوار ءُ۔ مسن تیکن 50 درسد وظیفہ جتا ءِ و ضرورت مند و کم شون ہلوک و مر مر انگا علاقہ غاتا طالب علم آتا خصوصی وڑاٹ است بڈی ءِ کننگ انگ ءِ۔ طالب علم آتیکن اہلیتی آب آ ہر سرکاری بشخ انا یونیورسٹی تیٹی میرٹ آ داخلہ ءِ تخنگانے و و نیزگاری نا لکیر آن کم کٹیا کروک خاہوت آتا طالب علم آتے اولیت تننگ انگ ءِ ۔ طالب علم آک http://ehsas.hec.gov.pkآ آن لائن یا پورو کوائف آتون اوار درخواست فارم ءِ تعلقدار یونیورسٹی تا مالی امداد نا دفتراٹی جمع کرفنگ کیرہ۔
ملک انا بھلا شارتیٹی بھلو کچ اسے ٹی مخلوق نیزگاری نا سوب آن روڈ آتا رہی آ، فٹ پاتھ ، پارک و پٹ ومیدان تیا خاچرہ، ہرافتے موسم تا غٹ تر سختی تے پٹ و میدان تے اٹ سگوئی تمک۔ وزیراعظم عمران خان دا حالیت آتا رداٹ ملک انا بھلا شارتیٹی رہینگ انگ نا ہند آتا جوڑ کننگ نا تصور ءِ پیش کرے و دادے عملی دروشم اس ترسا اسلام آباد، لاہور، کراچی، پشاور، ملتان و ایلو بھلا شارتیٹی رہینگ انگ نا ہند جوڑ کننگانے ہراڑے نیزگار و بے سیبو مخلوق تینا شناختی کارڈ ءِ نشان ترسا مفت رہینگ انگ کیرہ۔ داکان پد دا پروگرام ءِ مون آ ودفسا دا رہینگ نا ہندآتتون و ایلو ہند خاص وڑاٹ بھلا ہسپتال آتون لنگر خانہ جوڑ کننگانے۔ داتم اسکان پبلک پرائیویٹ شریداری نا رداٹ پنجاب، سندھ، خیبر پختونخوا و اسلام آباد اٹی لنگرخانہ ملنگانے۔ وزیر اعظم عمران خان ’’احساس سیلانی لنگر‘‘ اسکیم نا بناءِ اسلام آباد اٹی 7 اکتوبر 2019 آ کرے۔ داوخت آ وزیراعظم عمران خان پارے کہ مچ آ ملک اٹی اولیکو مرحلہ ٹی 112 لنگرخانہ ملنگک۔ دا لنگرخانہ غاتے ہمو علاقہ غاتے ٹی ملنگک ہراڑے خواری کش آک، بے روزگاری و بین انا گواچی ءُ۔ اوپارے کہ حکومت کاروبار و صنعت آتا مون آ دننگ کن ہروڑکمک فراوان کننگ ءِ، مشکل وخت ءِ ولے ننے نزور تپہ غاتا احساس ارے و ننا کوشست ءِ کہ کس لنگڑسلپ۔
زالبول آک ننا آبادی نا نیمہ غان زیات ءُ، ولے تعلیم و ایلو پڑتیٹی پدی سلنگ نا سوب آن اوفتا راج انا شونداری ٹی کڑد مفننگ نا بریبر ءِ۔ دازالبول آتا حالیت بھاز بے وڑءِ ہرا جنوزان یا مطلقہ ءُ و یا پین برام کننگ کپسہ و اوفتے کن کٹوک و ولفوک ہچ کس اف۔ راج انا دا تپہ غاتا شرحالی کن احساس کفالت پروگرام نا بناءِ 31 جنوری 2020 آ کننگاسس۔ داپروگرام نا رداٹ داتم اسکان 4576463 حقدار زالبول فائدہ ہرفینو۔ دا پروگرام نا رداٹ 70 لکھ زالبول ءِ کفالت کارڈز تننگ انگ ءِ۔ حکومت خواہک کہ 200 ارب روپئی براہ راست حقدار اسکان سرمرے۔ دابابت ڈاکٹر ثانیہ نشتر نا پاننگ ئس کہ بی آئی ایس پی نا حساب وکتاب 10 سال متکن ئس، ساڑی حکومت باقاعدہ سروے و نادرا ڈیٹابینک آن حقدار آتا گچینی ءِ کننگانے۔ احساس کفالت پروگرام کن اِرابینک آتون معاہدہ کننگانے۔ احساس کفالت پروگرام 100 درسد بائیو میٹرک ءِ۔ حقدار زالبول آتا بینک آتسکان رسینگ نا عمل ءِ آسان کننگانے۔
نیشنل پاورٹی گریجویشن انیشی ایٹو‘‘ نا جامع ملک گیر پروگرام اسہ وخت اٹی 100 آن زیات ضلع غاتیٹی درستی راستی کرفنگانے۔ داپروگرام نا رداٹ سُود آن پاک وام، کسبی و فنی تربیت نا آسراتی فراوان کننگ انگ ءِ۔ نیشنل پاور گریجویشن انیشی ایٹیونا کساسءِ 42 ارب 65 کروڑ روپئی خلنگانے ہرانا مسخت بھاز پدسلوک تپہ غاتا اُراتے نیزگاری نا مین آن کشسا شونداری نا کسر آ روان کننگ نا ءِ۔ پروگرام نا مسہ بشخ ءُ ہرافتے ٹی میرات آتا بشخنگ، بے سود وام تا فراوانی و میرات آتا گچین کاریم اٹ اتنگ کن کسب سازی اوار ءِ۔داپروگرام نا بنداوی مسخت محروم تپہ غاتا اُراتا زکواۃ، بیت المال و بے نظیر انکم سپورٹ پروگرام آ سیبو ءِ چٹفسا اوفتے زرگزرانی دنگ اٹ اوار کننگ و وتواجہ کننگ نا ءِ۔ داپروگرام اٹی ایشیائی شونداری بینک و جہانی فنڈ کشاری شونداری نا کمک ہلنگانے۔ داٹی 40 شریدار ادارہ غاتا کمک دوئی ءِ۔ دافتے ٹی اخوت و رورل سپورٹ پروگرام ہم اوار ءُ۔ پروگرام آن 100 ضلع غاتیٹی 16.28ملین مخلوق فائدہ ہرفرہ ہرافتے ٹی 50 درسد زالبول ہم اوار ارے۔ 25 ہزار نیزگار بندغ آتیٹی میرات آتا بشخنگ پروگرام اٹی اوار ءِ۔ داکان بیدس اوفتے سرسہب کاروبار اس کننگ کن فنی و کاروباری تربیت ہم فراوان کننگ انگ ءِ و ہربندغ ءِ اوسطا پنجا ہزار مالیت نا میرات فراوان کننگک۔ داکان بیدس او بے سود وام ہم ہلنگ کیرہ۔ میرات آتیان 1.45 ملین مخلوق فائدہ ہرفرہ، بے سود وام تا فراوانی دا پروگرام نا اہم ءُ بشخ اسے ہرانا رداٹ 20 ہزار روپئی آن 75 ہزار روپئی اسکان نا 80 ہزار وام تُوئی فراوان کننگ نا ٹارگٹ ءِ۔ چارسال اٹی جم وڑاٹ3.8 ملین بے سود وام بشخنگک۔ پروگرام نا رداٹ میرات و بے سود وام ہلوک آ بندغ آتے فنی تربیت ہم فراوان کننگک تانکہ دا بندغ آک تینا کاروبار اٹی پوسکنی اس اتنگ کیر۔ دامسخت کن بنجائی وزارت تعلیم و کسبی تربیت و نیوٹیک آن کمک ہلنگانے۔ احساس آمدن پروگرام نا بنا21 فروری 202 آ مسوسس۔ داپروگرام نا رداٹ داتم اسکان 25،054خاہوت آتے 1.5 ارب روپئی مالیت نا چنکا کاروباری میرات فراوان کننگانے۔
احساس پروگرام نا رداٹ وزیراعظم 10 مارچ 2020 ء آ احساس ضلعی پورٹل ڈیٹا فار پاکستان نا بناءِ کرے۔ دا پورٹل نا ٹہیفنگ حکومت نا راستکی تیا مبنی بنجائی ، صوبائی و ضلعی کہول آ ادارہ غاتا فیصلہ سازی نا عمل اٹ اہم ءُ گام اسے۔
احساس پروگرام نا بابت اے پی پی تون گپ وتران کرسا لاہور چیمبر آف کامرس اینڈ انڈسٹری نا صدر عرفان اقبال شیخ نا پاننگ ءِ کہ ای پاکستان نا 72 سال انا تاریخ اٹی داکان زیات شفاف و داکان زیات گچین ءُ پروگرام خنتنوٹ۔ داڑآن کروڑآ مخلوق ءِ فائدہ مریک، غٹ آن جوان انگا ہیت دادے کہ مخلوق ءِ اوفتا اُراتیٹی پیسہ تننگ انگ ءِ۔ ودادے اسُل شفاف تخنگانے۔ اوپارے کہ اولیکو مرحلہ سرسہبی اتون پورو مننگ آن پد وزیراعظم دانا ارٹ میکو مرحلہ نا پڑو ءِ کرینے، اومیت ءِ کہ ارٹ میکو مرحلہ ہم اولیکو مرحلہ غانبار ہندا سرسہبی اتون مخلوق ءِ فائدہ ایتک۔ لاہور چیمبر تینٹ ہم داٹی زیات آن زیات بشخ ہلیک، نن وزیراعظم نا فنڈ اٹی اِرا کروڑ روپئی، وزیراعلیٰ نا فنڈ اٹی اسہ کروڑ روپئی و گورنر پنجاب نا فنڈ اٹی ہم عطیہ جمع کرفینن و نن تینٹ ہم داکاریم ءِ کننگ اُن و اِرغ کُنفنگ اُن۔ عرفان اقبال شیخ پارے کہ ہراوڑاٹ اللہ نا مخلوق نا خذمت ءِ کننگانے دانا داڑے مہالو ہچ ءُ درور اس اف۔ ننے اومیت ءِ کہ دا پروگرام پین سرسہب مریک و نن دل و جان اٹ داڑتون سلوک اُن۔
اسلام آباد چیمبر آف کامرس اینڈ انڈسٹری نا ایگزیکٹو باسک بابر چوہدری پاہک کہ وزیراعظم عمران خان نا حکومت ہرااحساس پروگرام نا بناءِ کرینے دابھاز جوان ءُ پروگرام اسے، ہرا مخلوق نیزگاری نا لکیر آن شیف زند ءِ تیر کننگ ءُ اوفتے کن دااسہ ریلیف اسے۔ اے پی پی تون گپ وتران کرسا اوپارے کہ مہالو آن کاروباری حالیت آک خراب ئسر ولدا کورونا بس و کاروبار بند مس تو نیزگارآک بھلو مشکل اسے اٹ تمار۔ حکومت احساس پروگرام نا رداٹ دافتے ہرا کیش آتے تسنے دابھاز ستاکڑزک، داڑآن اوفتے وختی وڑاٹ ریلیف ملانے و او تینا بنداوی زند انا گرج آتے پورو کننگ کیرہ۔ بابر چوہدری نا پاننگ ئس کہ داوڑنا بایدے پین ہم پروگرام مرے۔ احساس پروگرام آن مخلوق تینا زند انا آب ءِ گچین کننگ کیک۔ ننے مرے کہ نن وزیراعظم نا کمک ءِ کین تانکہ حکومت داوڑنا پین پروگرام تا بناءِ کننگ کے۔
اسلام آباد اسٹیٹ ایجنٹس ایسوسی ایشن نا جنرل سیکرٹری چوہدری زاہد رفیق نا پاننگ ءِ کہ ای وزیراعظم عمران خان و خصوصی کمکار ثانیہ نشتر صاحبہ ءِ مبارکباد پیش کیوہ کہ اوفک احساس کیش پروگرام نا بناءِ کریر و مچ آ ملک اٹی نیزگار مخلوق ءِ اوفتا درگہ غا پیسہ تسر۔ اے پی پی تون گپ وتران کرسا اوپارے کہ دا پروگرام نا مچ آ دنیا ٹی دَرور ملیپک، ہراٹی شفافیت تون و گچین وڑاٹ مخلوق نا خذمت ءِ کننگا، داوڑنا پروگرامک بایدے برجامریر داپاکستان تحریک انصاف نا ویژن نا رداٹ ءُ۔
پنجاب یونیورسٹی انسٹی ٹیوٹ آف ایجوکیشن اینڈ ریسرچ نا پروفیسر ڈاکٹر عبدالقیوم چوہدری نا پاننگ ءِ کہ اگہ راج اٹ احساس مف تو نئے او راج اٹ امن مننگ کیک نئے کہ شون ہلنگ کیک۔ احساس پروگرام نا رداٹ 50 ہزار انڈرگریجویٹ اسٹوڈنٹ آتے اسکالر شپ تننگانے۔ دافتیان نئے بیرہ او اسٹوڈنٹ آک تینا تعلیمی خڑچ آتے پورو کیرہ بلکن دا چناتیٹی دااحساس ہم ودی مریک کہ اوفک حکومت نا داگام ءِ ریٹرن کروئی ءِ، ملک ءِ پدی تروئی ءِ۔ اوفتے احساس مس کہ اوفتا خیال ءِ تخوک آ اسٹ اس ارے۔ اے پی پی تون گپ وتران کرسا پروفیسر ڈاکٹرعبدالقیوم چوہدری پارے کہ ای داپروگرام نا بھاز ستاءِ کیوہ و اومیت کیوہ کہ حکومت احساس اسکالر شپ کون آ پین پروگرام تا ہم بناءِ کیک، ہیلتھ و ایجوکیشن سیکٹر اٹ جی ڈی پی نا پورشن ءِ ہم ودفک تانکہ داہڑتوم آ سیکٹر آک شون ہلیر و ننا ملک ہم شون ہلنگ کے۔
پنجاب یونیورسٹی نا اسسٹنٹ پروفیسر ڈاکٹر محمد راشد نا پاننگ ءِ کہ وزیراعظم عمران خان اخس کہ پروگرام تا بناءِ کرینے اوفتے ٹی نیزگارآتے مون آ تخنگانے، چائے او احساس کفالت پروگرام مرے یا اڑزآن اُراپروگرام مرے۔ احساس اسکالر شپ پروگرام نا رداٹ خواری کش و ہُشار ولے نیزگار طالب علم آتے تینا تعلیم ءِ پورو کننگ نا موقع ملانے۔ اے پی پی تون گپ وتران کرسا اوپارے کہ دا پروگرام ءِ برجاتخنگے و دانا دنگ ءِ ودفنگے و اسکالر شپ آتیٹی مر مر انگا و پدسلوک آ علاقہ غاتا طالب علم آتے زیات اہمیت تننگے تانکہ او علم انا روشنائی ءِ تینا علاقہ غاتیٹی ہم روشنا کننگ کیر و تینا علم انا ملاسی ءِ کسفنگ کیر۔
پنجاب یونیورسٹی ٹی ایم فل نا مسڑ مدیحہ خان نا پاننگ ءِ کہ وزیراعظم نا گام گیج آک مخلوق کن آسراتی نا سوب ءُ و دافتیان غٹ آن جوان انگا احساس اسکالر شپ پروگرام ءِ ہرانا حکومت نیزگار طالب علم آتے تعلیم نا وارخواہی فراوان کننگ کن بناءِ کرینے۔ اے پی پی تون گپ وتران کرسا اوپارے کہ دا اسکالر شپ نیزگار و ہُشار طالب علم آتے تعلیم ءِ برجاتخنگ نا وارخواہی فراوان کیک۔ نن اومیت کینہ کہ او دا اسکالر شپ پروگرام ءِ برجاتخک تانکہ ہمو طالب علم ہرافتے تون تینا تعلیم ءِ پورو کننگ نا وسیلہ اف او تینا تعلیم ءِ برجاتخنگ کیر۔
لاہور نا ہنکینی زالبول نسرین بی بی اے پی پی تون گپ وتران کرسا پارے کہ وزیراعظم نا احساس کفالت پروگرام بھاز جوان ءِ داڑآن نیزگارآتے بھاز فائدہ مسنے۔ ہرامخلوق کورونانا سوب آن بیروزگار مسوسر اوفتے کن بھاز مشکل ودی مسوسس۔ داپروگرام آن ملوک آ پیسہ غاتیان دا بندغ آک راشن ہلکر ہراڑآن اوفتے بھاز فائدہ رسینگا۔ ننے اومیت ءِ کہ وزیراعظم نا دا پروگرام چلینگک و ہرامخلوق ءِ پیسہ رسینگتنے اوفتے ہم ملک۔ عمران خان پاکستان نا غریب آتیکن اومیت نا روشنائی اسے۔
اسلام آباد اٹی محنت و مزوری کروک آ محمد طارق پاہک کہ احساس لنگرخانہ ٹی اودے مسہ وخت انا کُن وخور ملک، پارسل کُن و خور جوان وڑاٹ ملک و ہچ ءُ فریشانی اس مفک۔ دا حکومت بھاز جوان ءُ کاریم اس کرینے۔ اے پی پی تون گپ وتران کرسا اوپارے کہ ہراوخت آن لنگرخانہ جوڑ مسنے کُن و خور نا ہچ ءُ ویل اس اف۔
آزاد کشمیرنا شاری ظفر اے پی پی ءِ پارے کہ او ضلع باغ آن بس تو اوڑتون اسلام آباد اٹی رہینگ انگ کن جاگہ الوکہ، عمران خان نا بھاز منت وار اُٹ کہ او دا رہینگ انگ نا بست وبند ءِ کرینے نن عزت اٹ داڑے رہینگینہ و داجاگہ نا عملہ ہم بھاز جوان ءِ۔
