اسلام آباد۔ 20 جولائی (اے پی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر نا شونداری فنڈز 1 کروڑ 75 لکھ روپئی آن سنگجانی آن ڈھوک ٹمن روڈ ڈٹ پورو لس ٹریفک کن ملنگ انگانے، پاکستان تحریک انصاف نا راہشون ملک امتیاز پارے کہ بنجائی وزیر اسد عمر الس تون کروک آ وعدہ غاتے پورو کننگ ءِ۔ اوپارے کہ 2018 ء نا لس گچین کاری تیٹی بنجائی وزیر اسد عمر اسلام آباد نا حلقہ این اے 54 نا الس تون ہراوعدہ غاتے کریسس اوپوروی نا مرحلہ غاتیٹی ءُ۔ اوپارے کہ اسلام آباد نا خلقی آ علاقہ غاتیٹی واٹرسپلائی اسکیم، روڈو گلی تا پکاکننگ و بجلی نا فراوانی نا 9 کروڑ روپئی نا خڑچ آن کاریم برجاءِ۔ ملک امتیاز پارے کہ گچین کاری تیٹی ڈھوک ٹمن نا الس بنجائی وزیر اسد عمر آن روڈ ءِ پکا کننگ نا خواست کریسر ہرا اینو روڈ انا پوروی آن پورو مسنے ڈٹ آ 1 کروڑ 75 لکھ روپئی خڑچ کننگانے۔ اوپارے کہ پاکستان تحریک انصاف نا حکومت الس نا خذمت آ باور کیک و بھاز زوت ڈھوک پراچہ نا ہند آ اسہ جنرل ہسپتال اسے نا بنامننگ انگ ءِ۔
