اسلام آباد۔ 20 جولائی (اے پی پی) مچ آ ملک اٹی اینخو نا سال انا اولیکو 5 دے ئی انسداد پولیو مہم نا بناءِ دوشنبے آن کننگانے۔ کورونا نا دین انا سوب آن چارتُوآن پد دوشنبے نادے 20 جولائی آن چنکو کچ اسے ٹی دُوارہ پولیو مہم نا بناءِ کننگانے، داچرجوئی ٹی فیصل آباد، اٹک، سویلی وزیرستان نا ضلع غاتیان بیدس کراچی و کوئٹہ نا خاص انگا ضلع غاتیٹی پنچ سال آن کم ہشت لکھ چناتے انسداد پولیو نا پڑی کنفنگک۔ وزارت جان جوڑی آن جاری بیان نارداٹ وزارت جان جوڑی و جی پی ای آئی Polio Global Initiative Eradication نا پارت آتے مون آ تخسا پاکستان پولیو پروگرام غٹ مہم آتے پدبٹیسس و پروگرام ءِ کورونا نا دین انا گچین چاروکی نا زمواری تننگا۔ پاکستان انسداد پولیو پروگرام مچ آ پاکستان آن گچین وڑاٹ کورونا، پولیو و ایلوناجوڑی تا چاروکی ءِ کرے، لاک ڈاؤن، اوپی ڈی نا بند مننگ و ہن و بر نا آسراتی تا مفننگ نا سوب آن ناجوڑی تا انسداد نا مہم آک مننگ کتوس، اسہ اندازہ سے نا رداٹ ماہانہ اوسط ہفت لکھ پوسکن ودی مروک آ چناتے المی ویکسین تننگ نا چرجوئی زہمی مس، وخت اس کہ ایلو کنڈآ اُرا اُراغا ہنسا مہم زہمی مننگ آن چناتیٹی قوت مدافعت نا ویل ودی مس، دسمبر 2019ء و مارچ 2020ء ٹی سرسہب پولیو مہم آتے چلیفنگ آن پد مہم مفننگ نا سوب آن خراب ءُ زہم اس تما، ہنداخاطرآن ڈبلیو پی وی ون و ٹائپ ٹووائرس نا ودنگ نا رسک ودانے۔ وزیراعظم نا جان جوڑی کمکار ڈاکٹر ظفرمرزا پارے کہ کورونا دین انا ننا زرگزران آ بھلو زہم اس تمانے، پولیو مہم آتا مفننگ نا سوب آن چناتے پولیو وائرس نا گڑتی مون تروک ءِ، ننے داسہ ساڑی آ وخت اٹی کورونا تون زند ءِ تیر کننگ نا گرج ءِ، ای غٹ لمہ و باوہ غاتیان خواست کیوہ کہ او تینا چناتے مچ آ وئی نا معذوری آن بچفنگ کن انسداد پولیو نا پڑی ضرور کنفر، چناتا گچین جان جوڑی ننا اولیت ءِ۔ دُوارہ پولیو مہم نا بنانا ڈٹ بندی ءِ صوبہ غاتون تین پہ تینی سلابت اٹ ترتیب تننگا و جون نا تُو اٹی باقاعدہ پولیو نا ٹیکنیکل ایڈوائزری پڑک آن منظوری ءِ ہلنگا۔ ڈٹ بندی نا رداٹ اگست و ستمبر اٹ خاص انگاعلاقہ غاتیٹی و 2020ء ٹی مسہ قومی مہم چلیفنگ نا حکمت عملی اس جوڑ کننگانے، وزیراعظم عمران خان نا کماشی ٹی مروک آ 4 جولائی آ نیشنل کمانڈ اینڈ کنٹرول نا دیوان اٹی دُوارہ پولیو مہم نا بناء نا فیصلہ نا ستاءِ کننگا دادیوان اٹی غٹ صوبہ غاتا چیف سیکرٹریک ہم بشخ ہلکوسر۔ کوارڈنیٹر قومی ایمرجنسی آپریشنز سنٹر ڈاکٹر رانا محمد صفدر پارے کہ ’’اول ہمو علاقہ غاتیٹی مہم ءِ چلیفنگ انگ ءِ ہراڑے وائرس زیات ءِ، دامہم کن کورونا دین انا سوب اسٹاف ءِ خصوصی تربیت تننگانے، کہ ہراوڑ فاصلہ تخسا مہم ءِ چلیفینہ۔ اومستی پارے کہ اُرااُراٹی مروک آ مہم اٹی کورونا نا بارواٹ آگہی ہم تالان کننگک، راج انا غٹ مکتبہ فکر و خصوصی وڑاٹ لمہ و باوہ مہم نا سرسہبی ٹی تینا کڑد ءِ ادا کیر۔ پاکستان و اوغانستان دنیا نا اِراملک ءُ ہراڑے پولیو ناجوڑی داسکان ارے، پاکستان ءِ پولیو نا چٹفنگ کن ساڑی آ وخت اٹ بھلو چیلنج مون تروک ءِ، داسال داتم اسکان پولیو نا 58 کیس رپورٹ مسنے ہرافتے ٹی 21 خیبرپختونخوا، 20 سندھ، 14بلوچستان و 3 پنجاب آن مون آ بسنے۔ پولیو آن پنچ سال انا وئی نا چناک زہمی مریرہ۔ داناجوڑی آن چناک مچ آ زند اکن معذور مریرہ۔ دا چرجوئی ٹی وزیراعظم نا خصوصی کمکار جان جوڑی ڈاکٹر ظفرمرزا پارے کہ تدوک آ سال دسمبر اٹ سرسہب قومی مہم آنبار قوم 2020ء ٹی داوائرس نا توننگ نا جارحانہ گام گیج آتیکن تیار ءِ ہمیشہ کن ملک آن پولیو ءِ ماس کش کننگ نا مرحلہ ءِ پک کننگ نا ءِ۔
