اسلام آباد۔ 20 جولائی (اے پی پی) بنجائی وزیر تعلیم و کسبی تربیت شفقت محمود نا کماشی ٹی اسہ وڑ قومی نصاب نا بابت جاچ دیوان اس مس۔ ہراٹی اسہ وڑ نصاب نا بابت داتم اسکان نا پیش رفت آن معلومدار کننگا۔ بنجائی وزیر پارے کہ ہراتم اسکان پاکستان اٹی طبقاتی خلیج ساڑی مریک ہمووخت اسکان اسہ قوم و متحدہ پاکستان نا تغ پورو مننگ کپک ۔ اوپارے کہ اسہ قومی نصاب غٹ تپہ غاتے خڑک اتنگ اٹ کمکار مننگ کیک۔ شفقت محمود پارے کہ قومی نصاب یورپ نا شون ہلوک ملک آتیٹی ارے و ایشیائی ملک آتیٹی ہم دانا درورآک اریر۔ اوپارے کہ اسہ وڑ قومی نصاب نا آب اسہ وڑاسے ٹی ہم جہانی آب آن کم اف، داڑے ننا چناتا کاریم نا کچ اٹی ودکی و اوفتا فطری لیاقت آتے تالان کننگ نا سوب مریک۔ بنجائی وزیر تعلیم شفقت محمود تاکید کرے کہ اسہ وڑ قومی نصاب نا بابت ہر پیش رفت آن غٹ صوبہ و ایلو اسٹیک ہولڈرز آتے معلومدار تخنگے و تُو اٹی اِراوار غٹ صوبہ و ایلو اسٹیک ہولڈرآتون میٹنگ تخنگے۔ بنجائی وزیر پارے کہ داتو پاننگ مفک کہ اسہ وڑ قومی نصاب آن مچ آ نظام تعلیم بریبری نا کہول آ بریک ولے نظام تعلیم اٹ یکسانیت اتنگ کن دا ضرور اولیکو گام پک مریک۔
