اسلام آباد ۔ 19 جولائی (اے پی پی) صدر مملکت ڈاکٹر عارف علوی ءَ گوشت کہ ہمہ روچ دور نیست انت وھدیکہ کشمیری شہیدانی ھون رنگ کارایت ءُ کشمیر ءِ پاکستان ءَ گوں الحاق بیت۔ یک شمبے ءَ کشمیر ءِ یوم الحاق پاکستان ءِ سرا کلوھ ءِ تہ آہاں گوشت کہ 19جولائی 1947ءَ پاکستان ءَ گوں کشمیر ءِ الحاق ءِ منگ نامہ منظور کنگ بوتگ۔اے روچ گوازینگ ءِ مکسد اے جزم ءِ درشان انت کہ کشمیری بھارت ءِ قوضہ ءَ چہ آجوئی ءُ پاکستان ءَ گوں الحاق ءِ ھاترا پُرجزم انت۔پاکستان کشمیریانی سرا بھارتی زلم ءِ ھلاپ ءَ ہمک فورم ءِ سرا توار برز کنگ انت۔آہاں گوشت کہ عالمی تبک سرا ھم بھارت ءِ زوربرتگیں کشمیر ءِ تہ انسانی ھقانی ھلاپ ورزیانی سرا توار برز بوھگ انت۔صدرمملکت ءَ گوشت کہ بھارت کشمیری ءَ را اقوام متحدہ ءِ سلامتی کونسل ءِ تہ من اتگیں حق خودارادیت ءِ باروا ھلاپ ورزی ءَ کنگ انت۔ بھارتءِ کشمیر ءِ تہ آباتی ءِ درسد بدل کنگ ءِ گامانی اقوام متحدہ ءِ منگ نامہ ءِ ھلاپ ورزی انت۔آہاں گوشت کہ عالمی برادری اقوام متحدہ ءِ منگ نامہ ءِ سرا وڈ ءُ پیم ءَ کنائںگ ءِ سرا وتی کرد ءَ ادا کن ایت۔
