بورہ نا نہاد آتیٹی کمتی کن بنجائی و صوبائی کہول آ سلابت برجاءِ، شوگر انکوائری کمیشن نا رپورٹ نا رداٹ بے وڑی تیٹی اوار شوگرمل آتا برخلاف کارروائی کن گام گیج کننگ انگ ءِ، خصوصی کمکار احتساب شہزاد اکبر نا پریس کانفرنس

اسلام آباد۔ 17 جولائی (اے پی پی) وزیراعظم نا خصوصی کمکار احتساب شہزاد اکبر پارینے کہ بورہ نا نہاد آتیٹی کمتی کن بنجائی و صوبائی کہول آ سلابت برجاءِ، شوگر انکوائری کمیشن نا رپورٹ نا رداٹ بے ڈولی تیٹی اوار شوگرمل آتا برخلاف کارروائی کن گام گیج کننگ انگ ءِ۔ داخیال آتا درشانی ءِ او جمعہ نادے آ داڑے پریس کانفرنس کرسا کرے۔ خصوصی کمکار احتساب شہزاد اکبر پارے کہ حکومت شوگر کمیشن نا انکوائری رپورٹ آن پد پین گام گیج کننگ ءِ، الس ءِ داڑآن معلومدار کننگ المی ءِ۔ اوپارے کہ ہراتم 2009ء ٹی بورہ نا تنکی ودی مس تو مسابقتی کمیشن کارٹلائزیشن نا پیدواری ءِ کرے و داٹی اوار شوگرمل آتے جرمانہ کرے۔ ہمووخت آ شوگرملز ایسوسی ایشن و ایلو ملک آک داڑآ حکم امتناعی ہلکر۔ داحکم امتناعی داسکان برقرار ءِ، ہمووخت انا حکومت آک داحکم امتناعی ءِ چٹفنگ کن کوشست کتوس، ہندا مستین نا حکومت و ساڑی حکومت نا سوچ انا پرخ ءِ، ساڑی حکومت نا دور اٹی ہراتم بورہ نا تنکی ودی مس تو وزیراعظم عمران خان دمدستی وڑاٹ انکوائری کمیشن اس ٹہیفے۔ اوپارے کہ وزیراعظم عمران خان شفاف، آجوانکوائری کرفے و وعدہ نا رداٹ انکوائری رپورٹ ءِ الس نا مون آ ایس، مستین اٹی اسہ کمیشن اسے نا رپورٹ ءِ ہم پبلک کننگتنے، عزیر بلوچ نا جے آئی ٹی رپورٹ عدالت نا پرمان آ مون آ اتنگا۔ اوپارے کہ ساڑی حکومت نا انکوائری کمیشن نا رپورٹ نا برخلاف شوگرملز ایسوسی ایشن اسلام آباد ہائی کورٹ آن حکم امتناعی ہلک ولے حکومت نا موقف ءِ بِننگ آن پد عدالت حکم امتناعی ءِ چٹفے اوکان پد ملز مالک آک سندھ ہائی کورٹ آ ہنار و ہموکان حکم امتناعی ہلکر ہرادے حکومت سپریم کورٹ اٹ چیلنج کرے۔ سپریم کورٹ سندھ ہائی کورٹ حکم امتناعی ءِ چٹفے و تعلقدار ہائی کورٹ آتے مسہ ہفتہ ٹی فیصلہ کننگ نا پرمان کرے۔ اوپارے کہ حکومت الس نا رکھ اکن سلوک ءِ، دا وڈی خوری ٹی ہرکس کہ اوار مس اونا برخلاف کارروائی کینہ۔ اوپارے کہ شوگر کمیشن تون اوار اوار نُت تنکی نا جاست وپاست کن ہم چندی گام گیج سلاہ کننگاسس۔ داگام گیج آتارداٹ خولم ہلنگ اٹ ودکی کننگا، دارپورٹ اٹ خولم دُزی نا بابت ہم پاننگاسس۔ اوپارے کہ وزیراعظم عمران خان فوڈ پرائس کنٹرول کمیٹی نا تینٹ کماشی ءِ کیک۔ پنجاب اٹی 20 کلو نُت انا تھیلہ 860 روپئی ٹی رسینگ انگ ءِ، اگہ کس اسے دانا نہاد آ غاو ارے تو او پنجاب حکومت نا ہیلپ لین آ غاو تے درج کرفنگ کیک۔ خصوصی کمکار پارے کہ 2018 ء ٹی پنجاب نا 667 فلور مل آتے سبسڈی آ خولم تننگا، ہرافتیان 149 فلور مل خولم نا دُزی و فکس ریٹ آ نُت تفننگ اٹ اوار خننگار۔ گڑاس مل آک کوڑی ہم کریر۔ داجاست وپاست اٹی جم وڑاٹ 254 ملین روپئی نا نغڑد مون آ بس۔ اینٹی کرپشن پنجاب 190 ملین روپئی نا ریکوری کرینے۔ ایلو ریکوری تیا کاریم برجاءِ۔