اسلام آباد۔ 16 جولائی (اے پی پی) اسپیکر قومی اسمبلی اسد قیصر تون وزیراعلیٰ خیبرپختونخوا محمود خان پنچ شنبے نادے آ پارلیمنٹ ہاؤس اٹی اوڑدہی کرے ہراٹی ملک انا جم زرگزرانی حالیت، خیبرپختونخوا ٹی برجا شونداری ڈٹ آتون اوار تین پہ تینی است خواہی نا باندات آتیا گپ وتران کننگا۔ اسپیکر قومی اسمبلی داوخت آ پارے کہ کورونا دین انا سوب آن نئے بیرہ پاکستان بلکن مچ آ دنیا نا زرگزران تیا منفی زہم تمانے، کورونا دین انا توننگ کن صوبہ غاک و بنجانا کنڈآن وخت آ چست کروک آ گام گیج آک ستاکڑزرہ۔ قومی اسمبی صوبائی اسمبلی تے کانود جوڑ کننگ نا عمل ءِ گچین کننگ کن ہروڑنا کمک فراوان کننگ کن تیار ءِ۔اوپارے کہ پاک۔ چین اقتصادی راہداری مچ آ ڈیہہ کن اسہ گیم چینجر ڈٹ اسے نا حیثیت تخک، سی پیک آن درملکی زرکاری ٹی ودکی مریک ہرانا ملکی زرگزران آ مثبت زہم تمک۔ سی پیک نا رداٹ کے پی کے ٹی جوڑ کروک آ صنعتی زون تیان روزگار نا وارخواہی تیٹی ودکی مریک و صوبہ ٹی شونداری نا اسہ پوسکن ءُ دور اس بناکیک۔ اوپارے کہ خیبرپختونخوا حکومت نا کنڈآن الس نا راجی آسراتی نا چست کروک آ گام گیج آک ستاکڑزرہ۔ اوپارے کہ اوغانستان پاکستان نا خڑک انگا ہمسایہ ملک ءِ و ہڑتوم آ ملک آتا نیام اٹ خوشگوار تعلقداری ہڑتوم آ ملک آتا الس نا گچین فائدہ غاتیکن المی ءِ۔ قومی اسمبلی ٹی پاک اوغان تعلقداری تے مون آ دننگ و پاک۔اوغان واپار اٹی بروک آ اڑاند آتے مر کننگ کن پاک اوغان فرینڈ شپ پڑک ایگزیکٹو کمیٹی اس ٹہیفنگانے۔ وزیراعلیٰ کے پی کے پارے کہ خیبر پختونخوا حکومت وزیراعظم عمران خان نا وژن نا رداٹ صوبہ ٹی حقی بدلی اتنگ اٹ لگوک ءِ۔ صوبائی حکومت الس نا اومیت آتیا پورو سلنگ کن کوشست کننگ ءِ۔ پاک۔اوغان تعلقداری ءِ پین سوگو کننگ کن اسپیکر قومی اسمبلی ناکوشست آک سفت نا قابل ءُ۔ داوخت آ وزیراعلیٰ اسپیکر ءِ کے پی کے نا حکومت نا کنڈآن پاک۔ اوغان واپار نا چرجوئی ٹی ہروڑ کمکاری نا باوری کرفینے و پارینے کہ الس نا بنداوی آسراتی تا فراوانی ساڑی صوبائی حکومت نا اولیت ءِ۔ ساڑی آ بجٹ اٹ شونداری ڈٹ آتیکن بھلو فنڈاس جتا کننگانے۔ سی پیک نا رداٹ صوبہ ٹی جوڑ کروک آ صنعتی زون تا وخت آ پوروی کن اولیتی بنداو تیا گام گیج کننگ انگ ءِ۔ صوبہ ٹی کورونا دین انا تالانی ءِ توننگ کن سمارٹ لاک ڈاؤن تون اوار ہروڑنا گام گیج چست کننگ انگ ءِ۔
