اسلام آباد۔ 16 جولائی (اے پی پی) وزیراعظم نا خصوصی کمکار تخفیف نیزگاری و راجی رکھ ڈاکٹر ثانیہ نشتر پارینے کہ پاکستان نا غٹ آن بھلا راجی رکھ انا پروگرام احساس کوویڈ۔ 19 نا سوب آن لاک ڈاؤن نا زرگزرانی اثرآتے کم کننگ اٹ نمان کڑد ادا کرینے، داحالیت آتے ٹی احساس ایمرجنسی کیش انا جم سرسہبی و دانا بھلوکچ اسے آ خواست انا رداٹ، حکومت ایمرجنسی کیش ٹارگٹ اٹ ودکی کرسا 16.9 ملین حقدار خاہوت آتسکان رسینگ کن 203 ارب روپئی نا بجٹ اس جتا کرینے۔ بنائی وڑاٹ 9 اپریل 2020ء آ دا پروگرام نا بناءِ کننگاسس تو 12 ملین حقدار آتے کن دانا بجٹ 144 ارب روپئی ئس۔ داخیال آتا درشانی ءِ او پنچ شنبے نادے آپریس کانفرنس آن تران کرساکرے۔ اوپارے کہ احساس پورو وڑاٹ اسہ شفاف، قاعد و ضابطہ غامبنی غیر سیاسی ءُ پروگرام اسے، داپروگرام اٹی صوبہ سندھ انا بشخ غٹ آن زیات ءِ ہراداپروگرام نا سیاسی مفننگ نا درشانی ءِ، اوپارے کہ احساس کیش ءِ پدتموک بندغ آتسکان سرکننگ کن تدوک آسال اٹی احساس حکمت عملی نا رداٹ ڈیجیٹل وڑوڈول اس ٹہیفنگا۔ ایس ایم ایس شارٹ کوڈ سروس نا کمک اٹ درخواست آتے بٹنگ انگا۔ حساب وکتاب نا جاچ، اہل قومی شناختی کارڈ نمبر آتا کاریم اٹ اتنگ و قومی راجی اقتصادی رجسٹری و دولت نا پراکسی(سفر، خراج، میرات آتا مالکانہ حساب وکتاب و سرکاری ملازمت نا حیثیت) و زرتس نا بائیو میٹرک تصدیق کننگا بائیو میٹرک پک کننگ نا ویل و کزیت کروک آ اہل حقدار آتا خاہوت آتے زرتننگ بھلو چیلنج اس ئس۔ اوپارے کہ بائیو میٹرک مشکل آتا سوب حقدار بندغ آتیٹی زرتس ءِ پک کننگ کن احساس گیگ بدل وڑوڈول اسے نا ایسر پیش کرے، داسہ داوڑنا حقدار بندغ آتے بائیو میٹرک پک کننگ آن بیدس شریدار بینک آتا مخصوص بینک شاخ تیٹی خصوصی وڑاٹ زرتننگ انگ ءِ۔ اوپارے کہ زوال کروک آ حقدار بندغ آتا خاہوت آتے کن زرتننگ نا عمل ءِ آسان کننگ کن اپیل نا وڑوڈول اس وضع کرینے، داسہ کزیت کروک آ حقدار بندغ آتا خاہوت ڈاکٹر ثانیہ نشتر نا پن آ احساس دفتر اسلام آباد کبنہ ناباسک اناسرجم آتون اوار درخواست آتے گدریفینہ۔ اوپارے کہ 8 جولائی 2020ء آ احساس، احساس ایمرجنسی کیش پورٹل نا بناءِ کرے تانکہ احساس ایمرجنسی کیش اتون رجسٹرڈ مخلوق ءِ اوفتا اہلیتءِ ہُننگ کن آسان کسر اس فراوان کے۔ ہموغٹ درخواست تروک آک ہرافک 8171یا وزیراعظم نا لیبرپورٹل نا کمک اٹ تینا اندراج ءِ کرفینو او داسہ پورٹل آ تینا شناختی کارڈ نمبر ءِ درج کرسا آسانی اٹ تینا اہلیت نا حیثیت ءِ ہُننگ کیرہ۔ اوپارے کہ اگہ اواہل اریر تو اوتینا خڑک انا احساس زرتس ہند آتیان تینا نغد زرآتے ہلنگ کیرہ۔ اوپارے کہ داتم اسکان مچ آ ملک اٹی احساس ایمرجنسی کیش انا رداٹ اسہ کروڑ 28 لکھ 63 ہزار آن زیات خواری کش بندغ آتیٹی 155 ارب 64 کروڑ روپئی آن زیات نا کمکی زر بشخنگانے۔
